Vendosni fjalën kyçe....

E kishte përshtatur lokalin për përdorimin e drogërave, arrestohet 36-vjeçari në Fier


Një 36-vjeçar është arrestuar sot në Fier, pas një operacioni antidrogë.

Siç bëjnë me dije uniformat blu, 36-vjeçari me inicialet E.D, i kishte përshtatur ambientet e lokalit të tij në lagjen ‘29 Nëntori’ në ambiente për përdorimin e drogërave.

Në momentin e arrestimit, ky person kishte me vete mbi 1 kilogramë fara kanabisi, që sipas policisë kishte për qëllim t’i shiste për kultivim. Po ashtu kishte edhe 650 gram kanabis ebërë gati për t’u ndarë në doza.

Njoftimi i Policisë:

Finalizohet një tjetër operacion për goditjen e veprimtarisë kriminale në fushën e narkotikëve.

Operacioni policor i koduar “Parandalimi”, i zhvilluar nga Seksioni për Hetimin e  Narkotikëve në bashkëpunim me forcën e posaçme “Shqiponjat”.

Sekuestrohen fara kanabisi dhe lëndë narkotike cannabis sativa.

Vihet në pranga poseduesi i lëndës narkotike, i cili kishte përshtatur lokalin për përdorim droge.

Specialistët për Hetimin e Narkotikëve në DVP Fier, në vijim të goditjeve kundër aktivitetit kriminal në fushën e prodhimit dhe shpërndarjes së lëndëve narkotike, pas një pune hetimore dymujore, bazuar edhe në informacionet e siguruara në rrugë policore, arrestuan në flagrancë shtetasin E. D., 36 vjeç, banues në Fier.

Arrestimi i këtij shtetasi u bë pasi gjatë kontrollit të ushtruar në lokalin e tij në lagjen “29 Nëntori” Fier, të cilin e kishte përshtatur si ambient për përdorimin e lëndëve narkotike, është kapur në kushtet e flagrancës me 1 kg e 140 gram fara kanabisi të cilat do ti shiste, me qëllim kultivimin e tyre si dhe  650 gram lëndë narkotike cannabis sativa e bërë gati për tu ndarë në doza  të cilat janë sekuestruar në cilësinë e provës materiale. 

Gjithashtu, gjatë operacionit u sekuestruan edhe 1400 qese farmaceutike që shërbenin për paketimin e lëndës narkotike, 1 peshore elektronike që shërbente për peshimin e lëndës narkotike dhe një automjet. 

Materialet procedurale për veprime të mëtejshme do t’i kalojnë Prokurorisë pranë Gjykatës së Shkallës së Parë Fier, për veprat penale “Prodhimi dhe shitja e narkotikëve”, “Nxitja për përdorimin e drogës”, “Përshtatja e lokalit për përdorim droge”, “Fshehja e të ardhurave” dhe “Mospagimi i taksave dhe tatimeve”.