Gjykata Supreme e Brazilit ka anuluar të gjitha dënimet ndaj ish-presidentit të majtë të vendit, Luiz Inacio Lula da Silva, duke rivendosur të drejtat e tij politike për të kandiduar përsëri për postin e presidentit nw zgjedhjet e vitit të ardhshëm.
Gjykatësi i Gjykatës Supreme Edson Fachin vendosi të hënën që Gjykata Federale e 13-të e Curitiba, e cila kishte dënuar Lulën për pastrim parash dhe korrupsion, në të vërtetë nuk kishte juridiksion mbi çështjet.
Gjykatësi anuloi të gjitha dënimet e dhëna ndaj 75-vjeçarit në lidhje me ‘Operacionin Lava Jato’ – një hetim i madh anti-korrupsion, në të cilin u akuzuan tre ish-presidentë dhe zyrtarë të shumtë.
Vendimi i së hënës do të thotë që të drejtat politike të Lulës janë rivendosur, duke e bërë atë të lirw të kandidojë kundër udhëheqësit aktual të Brazilit, Jair Bolsonaro, në zgjedhjet presidenciale në 2022.
Vendimi i gjyqtarit ishte procedural dhe nuk përqendrohej në vlefshmërinë e çështjeve të mëparshme kundër Lulës. Një gjykatë më e ulët tani do të duhet të vendosë nëse ai duhet të rigjykohet për ato akuza. Prokurori i Përgjithshëm i Brazilit, Augusto Aras, tashmë ka njoftuar se ai synon të apelojë vendimin e Gjykatës së Lartë.
Lula shërbeu si president i Brazilit midis 2003 dhe 2011, një periudhë e rritjes së shpejtë ekonomike për vendin, qw pa miliona njerëz të dilnin nga varfëria përmes programeve të mirëqenies sociale.
