Kreu i Shtetit, Ilir Meta, ditën e sotme ka uruar 101 vjetorin e shpalljes së Tiranës kryeqytet.
Por Meta në urimin e tij nuk ka anashkaluar pa “hedhur thumba” mbi prishjen e disa nga godinat historike të qytetit.
Meta ka përmendur prishjen e Teatrit Kombëtar dhe Këndit të Lojërave tek Rruga e Elbasanit.
Madje Meta thotë se edhe Sahati po “zhduket” duke nënkuptuar ndërtimin e kullës ngjitur me të.
Vendin e godinave historike tashmë po e zënë “kullat që po mbijnë si kërpudha pas shiut”- thotë Presidenti.
“Gëzuar 101-vjetorin e shpalljes së Tiranës, kryeqendra e shqiptarëve!
Shumë i lumtur, që këtë datë të shënuar për mbarë kombin shqiptar, ta kremtoja sot me pinjollë të familjeve autoktone dhe patriotike tiranase, për t’ju shprehur të gjithë banorëve të Tiranës, vullnetin tim të palëkundur për të qëndruar përherë në krah të tyre dhe në mbrojtje të vlerave qytetare, që ata dhe kryeqyteti ynë i dashur përfaqëson.
Fatkeqësisht, për shkak të virusit të babëzisë, Tiranës këtë vit i mungojnë shumë prej monumenteve dhe vlerave të saj më të çmuara historike, tradicionale dhe kulturore.
Nuk kemi sot mes nesh, godinën e Teatrit Kombëtar, Këndin e Lojërave për fëmijë tek Rruga e Elbasanit, shumë shtëpi monumente kulture, godina karakteristike dhe tradicionale, që ishin kudo në kryeqytet. Ndërkohë, që edhe Sahati po “zhduket” dalëngadalë. Vendin e tyre po e zënë kullat, që po mbijnë pareshtur, si kërpudhat pas shiut.
Shkatërrimi i objekteve të trashëgimisë sonë kulturore e historike dhe dëmtimi i pariparueshëm i shumë prej tyre, padyshim është një gjenocid kulturor i papranueshëm për identitetin e Tiranës.
Garantoj tironasit e dashur dhe të gjithë shqiptarët, se së bashku me ta do të bëjmë përpjekje më të mëdha, për të mbrojtur trashëgiminë e vyer, që na ka mbetur dhe për të cilën janë sakrifikuar të parët tanë në breza, për t’i thënë: Ndal shëmtisë së kullave dhe barbarisë ndaj identitetit tonë kombëtar, që po ndodh në zemër të Shqipërisë!”-shkruan Presidenti.
