Tetë persona janë ndaluar nga policia e Tiranës 24 orët e fundit. Dy prej tyre kanë qenë në kërkim kombëtar ndërsa gjashtë të tjerë janë ndaluar në flagrancë.
Tre prej personave të arrestuar akuzohen për vjedhje, dy për dhunë në familje ndërsa një i ri për shkak se akuzohet se i ka vënë flakën pemës së Krishtlindjeve në bulevardin Dëshmirët e Kombit në protestën e datës 9 dhjetor.
Po kështu një qytetar është ndaluar pasi është kapur i dehur duke drejtuar mjetin e tij kurse një tjetër për trafik droge.
Njoftimi
Kapen dhe ndalohen 2 shtetas të shpallur në kërkim kombëtar. Arrestohen në flagrancë 6 shtetas të tjerë, për vepra të ndryshme penale. Në vijim të punës për kapjen e personave të kërkim, nga strukturat e DVP Tiranë u bë kapja dhe ndalimi 2 shtetasve, konkretisht:
Nga specialistët për Hetimin e Krimit në Komisariatin e Policisë Nr. 1 u bë kapja dhe ndalimi i shtetasit O. Xh., 22 vjeç, pasi më datë 09.12.2020, gjatë protestës së zhvilluar në bulevardin “Dëshmorët e Kombit” i ka vënë flakën pemës së Krishtlindjeve.
Nga specialistët për Hetimin e Krimit në Komisariatin e Policisë Nr. 6 u bë kapja dhe ndalimi i shtetasit E. L., 34 vjeç, si dhe u shpall në kërkim shtetasi R. C., 21 vjeç, pasi më datë 11.12.2020, në bashkëpunim me njëri-tjetrin, kanë vjedhur mjetin motor në pronësi të shtetasit I. L.
Specialistët e Seksionit për Hetimin e Narkotikëve bënë arrestimin në flagrancë të shtetasit A. H., 27 vjeç, pasi në rrugën “Shemsie Haka”, gjatë kontrollit fizik iu gjet e u sekuestrua në cilësinë e provës materiale një sasi lënde narkotike kokainë.
Nga specialistët për Hetimin e Krimit në Komisariatin e Policisë Nr. 1 u bë arrestimi në flagrancë i shtetasit A. K., 28 vjeç, pasi i ka vjedhur telefonin shtetasit G. Gj.
Po nga specialistët për Hetimin e Krimit në Komisariatin e Policisë Nr. 1 u bë arrestimi në flagrancë i shtetasit G. B., 67 vjeç, për veprat penale “Prishja e qetësisë publike” dhe “Vjedhja”.
Specialistët për Hetimin e Krimit në Komisariatin e Policisë Nr. 2 bënë arrestimin në flagrancë të shtetasit D. L., 45 vjeç, i dënuar më parë për veprën penale “Dhuna ne familje”, pasi në rrugën “Dëshmorët e Fekenit”, në gjendje të dehur dhe në kundërshtim me vendimin e Gjykatës, ka ushtruar dhunë psikologjike në prezencë të dy fëmijëve, ndaj bashkëshortes, e cila është e pajisur me urdhër mbrojtjeje.
Nga specialistët për Hetimin e Krimit në Komisariatin e Policisë Nr. 6 u bë arrestimi në flagrancë i shtetasit A. K., 45 vjeç, pasi në rrugën “Loni Ligori”, ka ushtruar dhunë fizike ndaj vajzës së tij të mitur dhe për të shmangur shoqërimin e tij, ka goditur për shkak të detyrës punonjësin e Policisë.
Specialistët e Qarkullimit Rrugor bënë arrestimin në flagrancë të shtetasit K. S., 32 vjeç, pasi në rrugën “Sulejman Pasha”, u kap duke drejtuar mjetin në gjendje të dehur, në masën 0.61 mg/l.
Materialet iu dërguan Prokurorisë së Rrethit Gjyqësor Tiranë, për veprime të mëtejshme.
