Presidenti Meta theksoi sot se qeveria duhet të rrisë sa më shpejt buxhetin për sistemin shëndetësore teksa vend përballet me pasojat e pandemisë Covid-19
Ai e bëri deklaratën gjatë një takimi me drejtorin e OBSH-së për Europën, Hans Kluge.
Kreu i shtetit theksoi gjithashtu se qeveria duhet të rimbursojë shpenzimet për trajtimin e koronavirus nga ana e qytetarëve, sidomos pensionistëve dhe kategorive në nevojë, duke qenë se kjo ka kosto të larta ekonomike.
“Zhvillova sot një takim të frytshëm me Drejtorin Rajonal të Organizatës Botërore të Shëndetësisë për Europën, Dr.Hans Kluge. Diskutuam për përkeqësimin e ritmeve të përhapjes së pandemisë COVID-19 në vendin tonë dhe masat efektive të menjëhershme, që duhen ndërmarrë në funksion të mbrojtjes së shëndetit të çdo qytetari.
Theksova nevojën e rritjes të buxhetit për sistemin shëndetësor, shtimin e numrit të testimeve dhe kapaciteteve spitalore për trajtimin e të prekurve, plotësimin pa zvarritje të mëtejshme të nevojave spitalore, si dhe unifikimin e protokollit të trajtimit në kushtet e shtëpisë.
Është tepër e domosdoshme rimbursimi i shpenzimeve për barnat dhe shërbimet për të sëmurët me COVID-19, veçanërisht të pensionistëve e qytetarëve në nevojë, të cilët trajtohen në banesë dhe që për shkak të të ardhurave të pamjaftueshme e kanë të pamundur përballimin e kostove të larta ekonomike.” shkruan Meta.
