Vendosni fjalën kyçe....

Meta: 25 prilli do jetë referendum për rrëzimin e sistemit oligarkik, opozita 5 hapa para qeverisë për pandeminë


Presidenti Meta ritheksoi sot se 25 prilli 2021 do jetë një referendum mbarëkombëtar për të kthyer Kushtetueshmërinë në vend.

Gjatë konferencës për shtyp me gazetarët, kreu i shtetit tha se ditën e zgjedhjeve shqiptarët do vendosin për rrëzimin e sistemit oligarkik që kërkon t’i kthejë qytetarët në njerëz pa vlerë.

“Populli i 2 marsit aty është, por është shumëfishuar. I ftoj edhe oligarkët që mos paguajnë kot sepse do zhgënjehen se nuk do ketë vazhdimësi të praktikave korruptive e klienteliste.

25 prilli do jetë një referendum mbarëkombëtar për të rrëzuar këtë sistem oligarkik që kërkon t’i kthejë qytetarët në persona pa vlerë, vetëm e vetëm që të fryhen si shushunja disa individë. Mbi Kushtetutën qëndron vetëm populli.” – tha ndër të tjera Meta.

Presidenti tha më tej se kreu i opozitës ka qenë model në situatën në të cilën ndodhet vendi ndërsa shtoi se opozita ka qenë pesë hapa para qeverisë për sa i përket pandemisë.

“Si mund të akuzohet zoti Basha kur ka qenë modeli në këtë situatë, i sjelljes shembullore për ruajtjen gjatë pandemisë. Mirë unë mund të akuzohesha deri tani. Ai ka qenë shumë bashkëpunues që kur ka filluar pandemia. Ai dhe opozita kanë qenë 5 hapa para qeverisë sa i përket pandemisë. Ata kanë kusuret e tyre që largohen nga parlamenti, por në sjelljen e tyre për pandeminë janë ekselentë, janë të përgjegjshëm.” – shtoi Meta.