Joe Biden ka paralajmëruar të hënën për një “dimër shumë të errët” përpara. Sipas Euronews, ai ka thënë se 200 mijë amerikanë mund të vdesin nga COVID-19 përpara se një vaksinë e sigurt dhe efektive të jetë e disponueshme në Shtetet e Bashkuara.
“Ekziston një nevojë për veprim të guximshëm për të luftuar këtë pandemi.”– tha Biden në Delaware. “Ne jemi akoma përballë një dimri shumë të errët.”
Duke pranuar lajmin pozitiv se një vaksinë nga Pfizer mund të jetë 90% efektive në parandalimin e virusit, Biden tha se Shtetet e Bashkuara ende nuk do të kenë një vaksinë për disa muaj.
Pasi të betohet si president, Biden do të përballet me detyrën e jashtëzakonshme të vënies së virusit nën kontroll. Shtetet e Bashkuara tejkaluan 10 milion raste me COVID-19 të hënën.
Biden iu lut njerëzve të përdornin maska për fytyrën dhe t’i përmbaheshin udhëzimeve për distancën shoqërore. Ai shtoi se “ne mund të shpëtojmë dhjetëra mijëra jetë nëse të gjithë thjesht do të vishnin një maskë për disa muajt e ardhshëm”.
“Ne mund ta marrim këtë virus nën kontroll, unë ju premtoj.”- tha Biden. “Ne mund të rindërtojmë ekonominë përsëri më mirë sesa ishte më parë. Ne mund të adresojmë pabarazitë që dëmtojnë vendin tonë. Është në fuqinë tonë.”
