Ministri i Ministrisë së Drejtësisë, Selim Selimi ka shkarkuar nga detyra këshilltarin e tij Enis Qerka.
“Sot në mëngjes pas raportimit të mediave, kam liruar nga detyra Enis Qerkën”, ka shkruar ministri në Facebook.
Enis Qerka ishte emëruar së fundmi si këshilltar i jashtëm i ministrit Selimi por kjo nuk ishte bërë e ditur publikisht si në rastet e tjera.
Lajmi për emërimin e tij u publikua sot në gazetën Koha Ditore.
Enis Qerka ka qenë arrestuar në vitin 2018 së bashku me një grup nën dyshimin se është kapur me 113 kilogramë narkotike e dyshuar si heroinë.
Enis Qerka
Në atë kohë, mediat patën raportuar se Enis Qerka punonte si shofer në Byronë Kosovare të Sigurimeve, të udhëhequr nga Gani Thaçi, vëllai i presidentit Thaçi.
Edhe pse gjykata fillimisht kishte vendosur për një muaj paraburgim, Qerka dhe dy të tjerë u liruan pas një jave nga Apeli, me urdhrin për t’u paraqitur në stacion të policisë.
Gazeta Koha Ditore shkruan se ka pyetur ministrin e Drejtësisë, Selimi, se si e ka angazhuar për këshilltar një person të arrestuar me dyshimin për kontrabandim të 113 kilogramëve drogë, dhe në përgjigjet e dërguara nga kabineti i tij është thënë se “vendimi për z. Qerka si këshilltar i jashtëm është marrë pasi që ndaj tij kanë pushuar hetimet”. Por pas zhurmës që shkaktoi ky vendim i tij, Selimi duket se është tërhequr duke e shkarkuar këshilltarin.
