Një tjetër natë trazirash dhe vandalizmi ka tronditur Kenoshan në Wisconsin, teksa protestuesit pasi janë përplasur me Gardën Kombëtare. Kanë grabitur e vandalizuar dyqane e u kanë vënë flakën makinave në rrugë.
As vendosja e Gardës Kombëtare dhe as shtetrrethimi që hyri në fuqi në orën 20:00 të mbrëmjes të së hënës nuk i ka penguar protestuesit, disa prej tyre me armë zjarri, që të dalin në rrugë.
Trazirat u shkaktuan nga të shtënat ndaj 29-vjeçarit me ngjyrë Jacob Blake, nga policia të dielën. Blake u qëllua shtatë herë nga pas dhe tani po trajtohet në spital për plagët e tij.
Përballja mes Blake dhe oficerëve, që thuhet se erdhi pas një incidenti të dhunës në familje, u filmua dhe më pas u shpërnda në rrjetet sociale, gjë që nxiti trazira të cilat më pas u shoqëruan me plaçkitje dhe vandalizëm.
