I dërguari i posaçëm i Presidentit amerikan për bisedimet Kosovë-Serbi, Richard Grenell tha se udhëheqësit e dy vendeve do të takohen në Shtëpinë e Bardhë për bisedime më 2 shtator.
Kjo është konfirmuar dhe nga kryeministri i Kosovës, Avdullah Hoti.
Përmes një postimi në Facebook, Hoti ka konfirmuar të premten takimin mes zyrtarëve të Kosovës dhe Serbisë më 2 shtator në Washington.
Hoti thotë se në Shtetet e Bashkuara do të diskutohet me palën serbe, si dy shtete të pavarura.
“SHBA ka qenë gjithmonë vendimtare në procesin e shtetndërtimit të Kosovës.
Më 2 shtator takohemi në Shtëpinë e Bardhë për të diskutuar me palën serbe, si dy vende të pavarura, për projekte madhore të bashkëpunimit ekonomik që do ta ndërrojnë perspektiven ekonomike të Kosovës dhe rajonit. Kosova është e bekuar me miqtë që ka”, shkruan Hoti.
Ky është takimi dytë që është organizuar nga i dërguari i Shtëpisë së Bardhë për këtë dialog, Richard Grenell.
I pari, i planifikuar për 27 qershor, ishte anuluar për shkak të aktakuzës për krime lufte ndaj presidentit Hashim Thaçi. Megjithatë, dialogu mes këtyre dy shteteve ka rinisur më 16 korrik në Bruksel.
