Presidenti serb Vuçiç ka thënë se ‘terroristët’ që nxisin dhunën në Beograd do arrestohen dhe do mbajnë përgjegjësi, teksa Beogradi dhe qytete të tjera përballen me ditën e katërt të protestave.
Mbrëmjen e djeshme mijëra qytetarë u përplasën me policinë, që nuk hezitoi të përdorte gaz lotsjellës.
“Jam krenar për Serbinë që po i bën ballë kësaj situate.” – tha Vuçiç nga Parisi, ku po takohej me liderët francezë dhe gjermanë për të diskutuar lidhur me dialogun Serbi-Kosovë. Ai denoncoi dhunën dhe kaosin si terrorizëm të pastër.
Një masë protestuesish, kryesisht të rinj e të reja, u mblodhën përpara parlamentit serb të premten në mbrëmje, duke brohoritur parulla kundër Vuçiçit, kryeministres Brnabiç dhe gjithë qeverisë.
Brnabiç i quajti protestat ‘sjellje të papërgjegjshme’ dhe tha se Serbia regjistroi 386 raste të reja të Covid-19 të premten, së bashku me 18 vdekje.
