Dy persona kanë humbur jetën ditën e sotme në spitalin Infektiv në QSUT duke e çuar në 41 numrin e viktimave lidhur me Covid-19 sipas Ministrisë së Shëndetësisë.
Në njoftimin e publikuar thuhet se pacienti 67-vjeçar kishte disa sëmundje bashkëshoqëruese dhe nuk mundi të mbijetojë.
Më herët te Infektivi ndërroi jetë një paciente 73-vjeçare nga Shkodra që vuante nga hipertensioni.
Ditët e fundit në spitalin Infektiv kanë ndërruar jetë të tjerë pacientë po sipas Ministrisë së Shëndetësisë ata kanë qenë asimptomatikë dhe nuk kanë ndërruar jetë nga Covid-19.
Njoftimi
“Gjatë orëve të fundit një pacient 67-vjeçar nga Tirana ka ndërruar jetë në spitalin infektiv, i prekur nga COVID19, me disa sëmundje bashkëshoqëruese, pavarësisht perpjekjeve të stafit mjekësor.
Pas nje rëndimi të papritur, 67-vjeçari nuk arriti të mbijetojë nga disfunksioni kardio-respirator, pavarësisht terapisë intensive medikamentoze dhe ventilimit mekanik. 67-vjeçari vuante nga diabeti, fibrilacion atrial, hipertension dhe alzheimer.
Më herët, po në spitalin infektiv ndërroi jetë nga COVID19 një paciente 73-vjeçare nga Shkodra, e cila vuante nga hipertensioni, e shtruar prej disa ditësh në terapi intensive në gjendje të rëndë. Pavarësisht mjekimit dhe asistencës mjekësore, 73-vjecarja nuk mundi të mbijetojë.
Ministria e Shëndetësisë i shpreh ngushëllime familjeve të të ndjerëve që humbën njerëzit e dashur në këtë betejë të vështirë.
Nga fillimi i epidemisë, 41 qytetarë nuk e kanë fituar dot betejën me COVID19.”
