Spitali më i ri në Britaninë e Madhe i krijuar për 9 ditë, ka hapur dyert për të trajtuar pacientët me koronavirus që kanë nevojë për trajtim të kujdesit intensiv.
Siç shkruan BBC, spitali i ri në fakt ka qenë qendra e ekspozitës në Londrën e Lindjes, në të cilën zakonisht janë zhvilluar ekspozita apo konferenca. Por që tanimë është shndërruar në spital të përkohshëm, me 4 mijë shtretër.
Në nëntë ditë, sallat e ekspozitës me një siperfaqe prej 87,328 metra katrorë, janë përshtatur për më shumë se 80 reparte, duke u pajisur secili me 42 shtretër. Rreth 500 shtretër të pajisur plotësisht me oksigjen dhe ventilatorë, tashmë janë vendosur dhe ka hapësirë edhe për 3.500 të tjera.
Nëse do të arrinte kapacitetin, ky do të ishte një nga spitalet më të mëdha në botë.
Si u ndërtua?
Objekti, i cili u hap zyrtarisht të premten, u ndërtua me ndihmën e 200 ushtarëve në ditë nga Regjimenti Mbretëror Anglian. Ushtarët kanë punuar përkrah stafit të NHS-së dhe kontraktorëve.
Arkitektë dhe inxhinierë të BDP-së, firmës që ndihmuan në shndërrimin e qendrës, ishin pjesë e ekipit të planifikimit për krijimin e objektit.
Drejtori i BDP-së, James Hepburn tha që shkalla dhe koha për ndërtimin ishin ndryshe nga projektet e mëparshme të kujdesit shëndetësor.
Hepburn tha se tre ishin sfidat kryesore:
-Shpejtësia e konstruksionit dhe nga çfarë u bë ndërtimi
-Furnizimi i mjaftueshëm me energji elektrike, për respiratorët dhe pajisjet e tjera për shpëtimin e jetëve
– Marrja e gazeve mjekësore për secilin shtrat
Infrastruktura ekzistuese elektrike është modifikuar për t’u siguruar që furnizimi me energji elektrike mund të përballojë kërkesën – dhe të mos ndërpritet. Janë instaluar gjithashtu gjeneratorë të përkohshëm dhe rezervuarë oksigjeni, për të furnizuar shtretërit.