Albana Vokshi ka bërë thirrje që të merren masa për mbrojtjen e personelit mjekësor në vend.
Ajo shkruan se 14.3 përqind e të prekurve nga koronavirusi në vend janë personel shëndetësor dhe kjo është shifra më e lartë e krahasuar me çdo vend tjetër.
Vokshi tha se opozita ka ngritur zërin çdo ditë duke kërkuar mbrojtjen e personelit mjekësor.
Ajo bëri thirrje që Ministria e Shëndetësisë të shpërndajë menjëherë mjetet ndihmëse që erdhën në vend para pak ditësh.
‘Sot, Ministria e Shëndetësisë raportoi:
– 32 mjekë e infermierë janë prekur nga COVID-19,
Ose
– 14,3% e totalit të personave të prekur.
Kjo është përqindja më e lartë krahasuar me çdo vend tjetër, madje lë pas edhe Italinë e që e ka në nivelin 9%.
Jo vetëm kaq, por Ministria e Shëndetësisë, nuk tregoi as faktin që ndër 32 staf mjekësor, ka edhe kryeinfermiere pavionesh të cilat janë prekur duke punuar me përkushtim maksimal në vijën e parë të betejës ndaj këtij virusi. Të tjerë janë prekur me gjasa sepse maskat e skaduara jo vetëm nuk ishin mbrojtje për ta, përkundrazi …
Kemi ngritur zërin cdo ditë, kemi kërkuar që prioriteti numër një i Qeverisë të ishte mbrojtja e stafit mjekësor. Por ende sot, ata gjenden të vetëm e të pambrojtur, pa veshje të përshtatshme, pa doreza, pa maska….
Është #Urgjente, është jetike, që Ministria e Shëndetësisë të shpërndajë mjetet mbrojtëse që mbërritën para disa ditësh në Rinas. Asnjë staf mjekësor ose mbështetës nuk duhet të shqetësohet si të mbrojë veten e tij ndaj COVID19.
#MbroStafinMjekësor
#MbroQytetarët
#MbroJetën.’ – shkruan Vokshi.
