Papa Françesku bëri thirrje për vetëkontroll dhe dialog teksa tensionet mes SHBA-së dhe Iranit kanë arritur pikën e vlimit pas një sulmi ajror amerikan që vrau gjeneralin iranian, Qasem Soleimani.
‘Lufta sjell vetëm vdekje dhe shkatërrim’ tha Papa pas lutjes së tij të përjavshme në Sheshin e Shën Pjetrit.
‘Ka një frymë të lartë tensioni në shumë pjesë të botës. Unë u bëj thirrje të gjitha palëve të mbajnë gjallë dialogun dhe vetëkontrollin dhe të dëbojnë hijen e armiqësisë.’ – shtoi kreu i Vatikanit.
Në raportin e tij për takimin, ‘Vatican News’ vuri në dukje se Papa nuk përmendi ndonjë vend specifik, megjithatë e bëri të qartë se ai po i referohej situatës amerikano-iraniane.
Gjeneral Soleimani ishte komandanti i Forcës Quds, pjesë e Trupave të Gardës Revolucionare, e ngarkuar për veprimtari ushtarake jashtë Iranit.
