Vendosni fjalën kyçe....

Vrasja në Kavajë, gjykata lë në burg policin Bledar Toçi


Gjykata e Kavajës ka vendosur të lërë në burg policin e sigurisë në Burgun e Durrësit, Bledar Toçin, i cili akuzohet për vrasjen e Dritan Haxhollit.

Ngjarja e rëndë ndodhi pak ditë më parë në lagjen nr. 2 të Kavajës në banesën e Marsida Qatjas.

Toçi është njohur me masën e sigurisë nga ambientet e spitalit të Durrësit, ku ndodhet pasi mbeti i plagosur në qafë pasi Haxholli e kishte qëlkuar me armë.

Ndonëse më herët prokuroria deklaroi se ishte vrasje në kushtet e vetëmbrojtjes, grupi hetimor i organit të akuzës në bazë të provave ka ngritur akuzën ‘Vrasje me dashje’.

Në dokumentin zyrtar të Prokurorisë, thuhet se Marsida Qatja i kërkoi ndihmë mikut të saj, Bledar Toçi, shef i sigurisë së brendshme në burgun e Durrësit, që të ndërhynte për t’i zgjidhur një problem që kishte me ish-të dashurin e saj, Dritan Haxholli. Toçi i kishte premtuar asaj se do ta ndihmonte dhe kanë lënë të takohen në shtëpinë e saj.

Pas ngjarjes së rëndë, kanë qarkulluar disa versione. Fillimisht u tha se Bledar Toçi ishte kushëriri i Marsida Qatjas, ndërsa më pas doli se ishte thjesht miku i saj.

Oficeri i burgjeve ka mbërritur në shtëpinë e Marsida Qatjas rreth orës 20:30 të mbrëmjes së të mërkurës, bashkë me dy miqtë e tij, Xhulio Biturku dhe Ermir Çela.

Në disa media përflitet se këta të fundit kanë qëndruar në shtëpinë e Qatjas, ndërsa Toçi ka dalë dhe është kthyer pas 30 minutash me disa doza kokaine, të cilat nga hetimet paraprake rezulton t’i ketë marrë nga i vëllai, Bernardi.

“Në mbrëmje, Marsida Qatja, Bledar Toçi dhe dy të tjerët kanë konsumuar alkool dhe kokainë“, thuhet në dokumentin e organit të Akuzës.

Më vonë tek shtëpia e gruas ka shkuar Dritan Haxholli, i cili ishte në kërkim nga policia për dy akuza. Ai ka goditur dritaren e katit të parë me qytën e automatikut që kishte fshehur poshtë xhaketës’, dhe siç thuhet në dosje, “nëna e tre fëmijëve e ka ftuar të hyjë në shtëpi”.

Në dosje thuhet se fillimisht Dritan Haxholli i ka drejtuar armën Xhulio Biturkut, duke i thënë se “me ty kam punë pastaj”. Ndërsa Bledar Toçit i është drejtuar me fjalët “pse ma bën ti këtë” dhe menjëherë ka qëlluar me automatik në drejtim të tij, duke e plagosur lehtë në qafë. Zyrtari i burgut të Durrësit i është kundërpërgjigjur dhe me armën e shërbimit ka derdhur plot 17 plumba mbi Dritan Haxhollin.

Sipas gazetares Klodiana Lala, policia ka mbajtur të fshehtë me qëllim faktin e gjetjes së kokainës në banesë, ndërkohë që dyshohet edhe për ndryshim të skenës së krimit.


Leave a Reply

Your email address will not be published. Required fields are marked *