Koreja e Veriut ka ndërprerë bisedimet bërthamore me SHBA-në, menjëherë pasi ato filluan në periferi të Stokholmit në Suedi. Negociatori kryesor i Phenianit më pas i ka kërkuar Uashingtonit të ndryshojë qëndrimin e tij.
Kim Myong-gil, zyrtari i rangut më të lartë koreano-verior i pranishëm në bisedime, tha se negociatat nuk do të rifillojnë të paktën deri në fund të vitit dhe këshilloi palën amerikane të rishikojë pozicionin e saj.
Bisedimet e së shtunës ishin takimi i parë midis diplomatëve të SHBA-së dhe Koresë së Veriut pasi Donald Trump dhe Kim Jong-un ranë dakord të rifillojnë dialogun, ndërsa u mblodhën në zonën e demilitarizuar midis dy Koreve në qershor.
Para takimit suedez, Sekretari i Shtetit Amerikan Mike Pompeo tha se “duhet bërë shumë punë”, por shprehu shpresë se përparimi me Phenianin do të arrihet pas muajsh ngërç.
