Vendosni fjalën kyçe....

Gazeta gjermane: Së shpejti emra të rinj në rastin “Reket”


Gazeta gjermane “Deutche Welle” shkruan se është mundur që së shpejti edhe persona tjerë të përfshihen në hetimin për rastin “Reket”.

Sipas DW, ata dyshohen se janë bashkëpunëtorë të një prej të dyshuarve, emrat e të cilëve janë cituar në disa nga dëshmitë e deritanishme.

Deri më tani nuk ka asnjë përgjigje nëse kjo mund të ketë lidhje me një deklaratë të bërë një javë më parë nga pensionistja Liljana Todorovska, e cila është autore e idesë për të ndërtuar një Kompleks Evropian për Persona të Rritur, ide e cila është futur nëpërmjet organizatës joqeveritare “Lidhja Ndërkombëtare” e Bojan Jovanovskit. Në bazë të marrëveshjes me organizatën, Todorovskës në llogari bankare i janë transferuar 720.000 euro, të cilat, pas tërheqjes menjëherë i janë marrë prej bashkëpunëtorëve të Jovanovskit. Pasi rasti “Reket” e ka nxjerrë në pah edhe këtë episod, Todorovska për media ka deklaruar se është vjedhur.

Dhe nga deklaratat e dëshmitarëve varet se në çfarë gjerësie do të zgjerohet hetimi për rastin. Prokurorja Ruskoska, dje deklaroi se ende po punohet në hetimin financiar dhe për një pjesë të parave e dinë ku janë, ndërkaq për një pjesë tjetër po punojnë.

Përndryshe, në skandalin e zhvatjes, përpos prokurores speciale Katica Janeva, e cila tashmë ndodhet në burg, të dyshuar janë edhe dy persona, Bojan Jovanovski, i njohur me nofkën “Boki 13”dhe Zoran Milevski, i njohur si Zoki Kiçeec, të cilët dyshohet se kanë zhvatur biznesmenë nëpërmjet Janevës.

Dyshimet e prokurorisë janë se ata kanë marrë 1,5 milionë euro vetëm nga biznesmeni Orce Kamçev për t’ia lehtësuar procedurën hetimore për pastrim parash në lëndën “Perandoria”, ndërsa duhej të merrnin edhe 4,5 milionë euro të tjera, gjithsej 8 milionë. Gazeta italiane “La Verita” ka publikuar disa video-audio materiale, në të cilat shihet se si Boki 13 dhe Zoki Kiçeec marrin paratë prej biznesmenit Orce Kamçev në shtëpinë e tij.

VINI RE: Ky artikull është pronësi intelektuale e Deutche Welle