Policia e Lezhës ka arrestuar dy persona, të dyshuar për zjarrvënien në Malin e Shëngjinit. Të arrestuarit janë shtetasit me inicialet M. I.dhe A. U., respektivisht 34 dhe 24 vjeç.
Ata akuzohen se i kanë vënë zjarrin malit me qëllime përfitimi nga lëndët drusore dhe hapje kullotash për bagëti.
“Policia identifikon dhe arreston në flagrancë autorët e dyshuar të vënies së zjarrit në Malin e Shëngjinit. Zjarr i dyshuar i vënë për qëllime përfitimi, hapje kullotash për bagëti etj, i cili ka marrë përmasa duke djegur disa hektarë bimësi e pisha si dhe rrezikuar banesa. Proçedohet edhe një shtetas tjetër për zjarrvënie të qëllimshme në një sipërfaqe toke afër banesës së tij.
Specialistët për hetimin e krimeve në Komisariatin e Policisë Lezhë, në vijim të punës hetimore për identifikimin dhe vënien para përgjegjësisë ligjore të çdo personi për zjarrvënie të qëllimshme apo edhe nga pakujdesia që shkaktojnë dëme, kanë arrestuar në flagrancë shtetasit M.I. 34 vjeç, banues në Ishull Shëngjin dhe A.U. 24 vjeç, banues në Shëngjin.
Këta dy shtetas, në bashkëpunim me njëri – tjetrin, rreth orës 21:45 datë 22 gusht, në Malin e Shëngjinit tek ” Lugu i Lemes”, dyshohet që i kanë vënë zjarrin malit me qëllim hapjen e kullotave për bagëtitë dhe prerjen e lëndëve drusore për shitje, zjarr i cili ka marrë përmasa duke djegur disa hektarë bimësi e pisha si dhe rrezikuar banesa e jetë njerëzish.”, thuhet në njoftimin e policisë.
Personat akuzohen për veprat penale ” Shkatërrim prone me zjarr” kryer në bashkëpunim’ parashikuar nga neni 151 – 25 i Kodit Penal.
Gjithashtu, u referuan materialet hetimore për proçedim penalisht edhe ndaj shtetasit K.M. banues në Tresh – Lezhë, sepse dyshohet që i ka vënë zjarrin një sipërfaqe toke rreth 500 m2 ku nga zjarri është djegur edhe rrethimi me shkurre i stanit të bagëtive të tij.
Vepra penale ” Shkatërrim prone me zjarr ” parashikuar nga neni 151 i Kodit Penal. Materialet procedurale hetimore në ngarkim të shtetasve lartpërmendur, u referuan në Prokurorinë pranë Gjykatës Shkallës Parë Lezhë.”,
Për shkak të terrenit të thyer, zjarrfikësit dje u hasën në vështirësi. Në ndihmë të forcave zjarrfikëse të Lezhës, shkuan edhe ata të Shkodrës dhe të Tiranës.
