Sekuestrohen rreth 1.5 milionë euro pasuri të Admir Muratajt dhe familjarëve të tij. Policia bën të ditur se është sekuestruar vila tre katëshe në Prezë e familjes Murataj, tokat në pronësi të tyre, apartamente dhe automjete.
Kujtojmë se Admir Murataj, mbeti i vrarë në 9 prill, gjatë grabitjes së miliona eurove në aeroportin e Rinasit. Kujtojmë se për vrasjen e tij ka ende debate. Familjarët muajin e kaluar kanë paditur në prokurori Policinë e Shtetit lidhur me vrasjen e Muratajt.
Padia është ngritur nga e bija e Muratajt nëpërmjet avokatit të familjes, Arbër Hoxhaj. Sipas avokatit, Murataj është vrarë qëllimisht nga policia, pasi efektivët nuk kanë qenë në kushtet e vetëmbrojtjes.
Familjarët thonë se policia duhet ta kishte arrestuar 47-vjeçarin siç bëri me 6 personat e tjerë që janë ndaluar deri tani për grabitjen.
DETAJET E POLICISË
Tiranë – Sekuestrohen rreth 1.5 milion euro pasuri në pronësi të shtetasit A. M. dhe familjarëve të tij
Në kuadër të luftës kundër krimit të organizuar, në vijim të punës për gjurmimin, evidentimin dhe sekuestrimin e pasurive që rrjedhin nga veprimtaria kriminale, Departamenti i Policisë Kriminale në bashkëpunim me Seksionin për Hetimin e Pastrimit të Parave dhe Aseteve Kriminale në DVP Tiranë, në zbatim të vendimit të Gjykatës së Shkallës së Parë për Krime të Rënda Tiranë, kanë bërë sekuestrimin e pasurive të luajtshme dhe të paluajtshme të cilat i përkisnin shtetasve A. M., Sh. M. dhe C. M., dhe konkretisht:
Vilë 3 – katëshe e ndodhur në Prezë, Tiranë, me një sipërfaqe totale ndërtimi 300 m2 në emër të shtetasit A. M.
Tokë truall me sipërfaqe 600.3 m2 e shtetasit A. M., ndodhur afër Saukut,
Garazh me sipërfaqe 23 m2, në emër të shtetasit A. M., blerë në vitin 2016
Apartament me sipërfaqe 100.5 m2, në emër të shtetasit A. M.
Tokë truall, në emër të shtetasit A. M.
Apartament banimi në Sarandë, i porositur në datë 05.07.2012 tek një shoqëri ndërtimi, kundrejt shumës 90 000 euro.
Apartament, me sipërfaqe 71 m2, në emër të shtetases A. A.
9 automjete të llojeve të ndryshme relativisht të shtrenjta.
Vlera e pasurive të sekuestruara llogaritet rreth 1,5 milion euro.
Pasuritë e sekuestruara janë lënë në administrim të Agjencisë së Administrimit të Pasurive të Sekuestruara dhe të Konfiskuara.
Po punohet për identifikimin e pasurive dhe aseteve të tjera që kanë këta shtetas, por që nuk i kanë të regjistruar në emër të tyre.
