Një nga protestuesit e “Unazës së Re” ka folur ashpër ndaj qeverisë Rama. Ai është shprehur se do i shembet shtëpia dhe nuk do të marrë asnjë dëmshpërblim.
I riu ka theksuar se ka shoqëruar Veliajn në fushatë dhe se ka qenë pjesë e FRESH por sipas tij kjo që po ndodh në Astir është një katastrofë.
“Kam qenë një admirues i Ramës dhe Erion Veliajt, kjo që po ndodh tani është e tmerrshme. Kam shoqëruar Erionin në fushatë, kjo është një katastrofë. Qeveria shqiptare po na pi gjakun. Nuk u ngopën? Po na sjellin mafien këtu mes fëmijëve dhe po na marrin pronat”, u shpreh një qytetar.
Pak minuta më parë pati edhe përplasje mes banorëve dhe policisë në protestë. Banorët kanë tentuar të prishin rrethimin e kanitierit të parë që është ngritur për të ndërtuar “Unazën e Re” dhe janë përplasur me policinë.
Në vendngjarje ndodhet edhe kreu i Policisës së Tiranës, Kastriot Skënderaj dhe banorët janë duke debatuar me të. FNSH dhe policia nuk i lejojnë banorët të futen në kantier. Mësohet se disa prej tyre janë shoqëruar në polici.
Sot është dita e 16-të protestës dhe ata kërkojnë dëmshpërblim me vlerën e tregut nëse banesat e tyre prishen nga projekti i “Unazës së Re”.
“Poshtë hajdutët”, “Qeveri hajdute”, “Do vijmë,do vijmë do ta gjejmë shtëpinë”, “Turp, Turp”, janë thirrjet e banorëve.
