Gjykata e Apelit ka liruar nga burgu një prej rojeve private të sigurisë, të arrestuara për dhunën e ushtruar gjatë përplasjes me qytetarët protestues në Zvërnec, më 29 maj.
Për Gazmend Vathin, i cili ishte lënë në burg nga Gjykata e Vlorës, Apeli e zbuti masën e sigurisë në “arrest në shtëpi”, ndërsa për Artur Granin la në fuqi masën “arrest në burg”.
Ndërkohë, prej orës 14:00 po shqyrtohet ankimi i pronarit të kompanisë Major Security, Geraldo Biba.
Kujtojmë se gjatë përplasjeve me protestuesit në Zvërnec, një qytetar u tërhoq zvarrë nga forcat e sigurisë private, në prani edhe të efektivëve të Policisë së Shtetit, të cilët nuk reaguan.
Ndaj protestuesve u përdor edhe spraj piper, çka e rëndëoi edhe më tepër situatën gjatë tubimit.
Këto përplasje çuan në shkarkimin nga detyra të drejtorit të Policisë së Vlorës, Elidon Çela. Më pas, vendi u përfshi nga një valë protestash, të cilat vijojnë edhe sot.
