Bordi i Transparencës ka vendosur të rishikojë çmimet tavan të karburanteve në Shqipëri, duke përcaktuar nivele të reja për shitjen me pakicë dhe shumicë të naftës dhe benzinës.
Sipas vendimit të datës 27 maj 2026, çmimi i shitjes me pakicë për gazoilin është caktuar jo më shumë se 190 lekë për litër, ndërsa çmimi i shitjes me shumicë jo më shumë se 178 lekë për litër. Për benzinën, çmimi i shitjes me pakicë është vendosur në 179 lekë për litër, ndërsa ai me shumicë në 167 lekë për litër.
Çmimet e reja kanë hyrë në fuqi në orën 13:30 të së njëjtës ditë dhe do të mbeten të vlefshme deri në mbledhjen e radhës së Bordit, ku priten ndryshime të mëtejshme në varësi të lëvizjeve të tregut ndërkombëtar.
Institucionet përgjegjëse kanë bërë të ditur se do të monitorojnë zbatimin e vendimit nga operatorët e tregut të karburanteve dhe do të ndërmarrin masa ndëshkuese në rast shkeljesh, përfshirë pezullimin e aktivitetit.
Gjithashtu, autoritetet theksojnë se vendimi është në përputhje me kuadrin ligjor për akcizat dhe synon ruajtjen e konkurrencës së ndershme si dhe mbrojtjen e konsumatorëve.
