Holanda po çon përpara planet për të krijuar “qendra kthimi” për emigrantët jashtë Bashkimit Evropian, me hapat e parë që priten brenda pak muajsh, raportoi të hënën Politico, duke cituar ministrin e Emigracionit.
“Në të gjithë Evropën, njerëzit po kërkojnë zgjidhje të besueshme dhe të realizueshme për të rimarrë kontrollin mbi migracionin,” citohet të ketë thënë Bart van den Brink, zëvendëskryeministri dhe ministri holandez i Migracionit. Ai shtoi se zgjidhje të tilla “po marrin formë” dhe konsiderohen ligjërisht të qëndrueshme.
Sistemi i propozuar parashikon që azilkërkuesit, aplikimet e të cilëve janë refuzuar në BE, të transferohen në qendra të ndodhura jashtë bllokut, si pjesë e përpjekjeve për të reduktuar migracionin e parregullt dhe për të përmirësor procedurat e kthimit.
Bashkëpunimi evropian dhe shqyrtimi ligjor
Sipas një letre të dërguar nga qeveria holandeze në parlament, të cilën e citon Politico, Haga po eksploron mundësinë e përpunimit të aplikimeve për azil jashtë territorit të BE-së, në bashkëpunim me shtetet e tjera anëtare.
Plani raportohet se po diskutohet me disa partnerë evropianë, duke përfshirë:
Greqinë
Gjermaninë
Austrinë
Danimarkën
Këto vende kanë mbështetur thirrjet për masa më të rrepta ndaj migracionit në BE. Qendra e parë e kthimit pritet të ngrihet jashtë bllokut, ndonëse lokacioni nuk është njoftuar ende, pasi negociatat me vendet e mundshme pritëse janë duke vazhduar.
Një rishikim ligjor i porositur nga qeveria holandeze doli në përfundimin se nuk ka pengesa ligjore për realizimin e këtij plani.
Ky propozim vjen në një kohë kur institucionet e BE-së po finalizojnë reforma më të gjera të migracionit, mes debateve të vazhdueshme politike në mbarë shtetet anëtare mbi politikën e emigracionit.
