Rusia ka ndërmarrë sulme të shumta me dronë ndaj Ukrainës lindore gjatë natës së të martës, vetëm pak orë pas përfundimit të armëpushimit tre-ditor të ndërmjetësuar nga SHBA-ja, përcjell Euronews.
Sipas autoriteteve ukrainase, sulmet kanë shkaktuar të paktën një viktimë dhe katër të plagosur në rajonin e Dnipropetrovskut.
Kreu i administratës ushtarake rajonale, Oleksandr Ganzha, deklaroi se forcat ruse sulmuan pesë distrikte të rajonit më shumë se 20 herë me dronë, artileri dhe bomba ajrore.
Ndërkohë, forcat ruse kanë goditur edhe Kievin, ku sipas mediave ukrainase një ndërtesë 20-katëshe banimi është dëmtuar nga sulmet.
Objektiv i sulmeve u bë edhe rajoni i Fastivit pranë kryeqytetit ukrainas. Guvernatori rajonal Mykola Kalashnyk bëri të ditur se janë dëmtuar një kopsht fëmijësh, një pallat katërkatësh dhe dy banesa private.
Sulmet erdhën menjëherë pas përfundimit të armëpushimit 72-orësh të shpallur më 9 maj nga presidenti amerikan Donald Trump.
Gjatë periudhës së armëpushimit, Moska dhe Kievi akuzuan njëri-tjetrin për shkelje, megjithëse nuk pati sulme të mëdha, pavarësisht aktivitetit të vazhdueshëm me dronë dhe viktimave civile në të dyja palët.
Presidenti ukrainas Volodymyr Zelenskyy deklaroi se Ukraina kishte shmangur sulmet hakmarrëse me rreze të gjatë gjatë armëpushimit, por paralajmëroi se Kievi do të përgjigjet nëse Rusia rikthehet në ofensivë të plotë.
“Në të ardhmen do të reagojmë në të njëjtën mënyrë. Nëse rusët vendosin të rikthehen në luftë të plotë, pasojat do të jenë të menjëhershme”, tha Zelenskyy në një adresim publik.
