Kievi ka ndërmarrë një sulm me dronë ndaj Moskës gjatë natës, duke goditur një ndërtesë banimi në kryeqytetin rus, sipas raportimeve të kanaleve ruse në Telegram, të cituara nga Euronews.
Autoritetet ruse kanë reaguar me deklarata të kufizuara, ndërsa kryebashkiaku i Moskës, Sergey Sobyanin, konfirmoi sulmin, duke thënë se sistemet e mbrojtjes ajrore kanë arritur të rrëzojnë dronin dhe se nuk ka viktima.
Sipas tij, droni ishte drejtuar ndaj qytetit dhe është interceptuar në ajër.
Pamje të publikuara në rrjete sociale tregojnë një dron që fluturon në lartësi të ulët mbi Moskë pak pas mesnatës, ndërsa banorët raportuan shpërthime të forta në zonë. Fotografi të tjera tregojnë dëmtime në katet e sipërme të një ndërtese të lartë banimi në perëndim të qytetit, si dhe mbetje të dronit në rrugë.
Sipas raportimeve, sulmi ka ndodhur rreth 7 kilometra larg Kremlinit dhe Sheshit të Kuq, si dhe pranë ndërtesës së Ministrisë së Mbrojtjes së Rusisë.
Ngjarja ndodh në një periudhë kur Moska ka rritur ndjeshëm masat e sigurisë përpara paradës së Ditës së Fitores më 9 maj, një nga ngjarjet më të rëndësishme simbolike për Rusinë.
Autoritetet ruse kanë vendosur kufizime të komunikimit dhe kanë forcuar mbrojtjen ajrore në kryeqytet, ndërsa janë raportuar edhe transferime të sistemeve të shumta të mbrojtjes drejt Moskës.
Sulmi vjen në një moment tensionesh të larta ushtarake, ndërsa lufta në Ukrainë vijon të thellohet dhe goditjet me dronë në territorin rus janë bërë gjithnjë e më të shpeshta.
