Kancelari gjerman Merz të hënën rikonfirmoi kritikat ndaj Shteteve të Bashkuara dhe Izraelit për luftën e zgjatur me Iranin dhe u zotua se evropianët do shtojnë përpjekjet diplomatike për të gjetur një zgjidhje.
“Sa i përket Iranit, po, jam zhgënjyer,” tha Merz në një konferencë për shtyp në Berlin kur u pyet për deklaratat e tij të mëparshme se SHBA nuk ka një “strategji daljeje” dhe se amerikanët janë “poshtëruar” nga Teherani.
“SHBA dhe Izraeli supozuan që në fillim se ky problem do të zgjidhej brenda pak ditësh, dhe tani duhet të pranojmë se nuk është kështu,” tha kancelari.
“Prandaj ne, nga ana evropiane, duam të kontribuojmë në mënyrë diplomatike për të gjetur një zgjidhje.”
Kancelari konservator vuri në dukje se Gjermania ka rifilluar bisedimet direkte me Iranin dhe po konsultohet me partnerët rajonalë për të mbështetur nismat diplomatike që synojnë zgjidhjen e konfliktit.
“Po koordinohemi ngushtë me palën amerikane, por gjithashtu po e bëjmë të qartë se kemi ide evropiane për mënyrën se si mund të arrihet një zgjidhje e konfliktit,” tha Merz.
“Shpresoj të kemi sukses, por nuk jam i sigurt,” përfundoi ai, shkruan AA,
