Zyrtarët në Bruksel do të hartojnë një plan për përdorimin e paktit pak të njohur të ndihmës së ndërsjellë të BE-së në rast të një sulmi të huaj, ndërsa kritikat e Donald Trump ndaj NATO po intensifikohen.
Liderët e BE-së kanë rënë dakord që Komisioni Evropian të përgatisë një plan konkret mbi reagimin në rast se aktivizohet klauzola e ndihmës së ndërsjellë. Kjo u bë e ditur nga presidenti i Qipros, Nikos Christodoulides, i cili po pret bisedimet, shkruan The Guardian.
Diskutimet u përqendruan te neni 42.7 i traktatit të BE-së, një klauzolë që detyron vendet anëtare të ofrojnë ndihmë me të gjitha mjetet e mundshme nëse një vend sulmohet nga një shtet i huaj ose aktor jo-shtetëror.
Këto zhvillime vijnë në një kohë kur Donald Trump ka shtuar kritikat ndaj NATO-s dhe ka lënë të hapur mundësinë e tërheqjes së SHBA-së nga aleanca, duke krijuar tensione të mëdha në sigurinë euroatlantike.
Presidenti i Këshillit Evropian, António Costa, tha se BE-ja po harton një “manual” për zbatimin e kësaj klauzole, duke përmendur edhe një rast të fundit në Qipro, ku disa vende evropiane ofruan mbështetje pas një sulmi me dron.
Deri më tani, vetëm Franca e ka aktivizuar nenin 42.7, pas sulmeve terroriste në Paris në vitin 2015. Megjithatë, mungesa e detajeve konkrete në traktat ka krijuar pasiguri për mënyrën e zbatimit të tij në praktikë.
Zyrtarët e BE-së theksojnë se, ndonëse NATO mbetet baza kryesore e mbrojtjes kolektive, BE-ja ka mjete shtesë si sanksione, ndihmë financiare dhe humanitare që mund të përdoren në raste krize.
