Kina ndërhyri të hënën për të zbutur rritjen e çmimeve të karburanteve, duke rritur çmimet tavan të rregulluara për benzinën dhe naftën, por duke e kufizuar këtë rritje në rreth gjysmën e nivelit që do të zbatohej normalisht sipas mekanizmit të saj të çmimeve, përcjell Reuters.
Megjithatë, edhe me këtë ndërhyrje, rritja e çmimeve mbetet më e madhja e regjistruar, duke i afruar nivelet me ato të vitit 2022, pas pushtimit të Ukrainës nga Rusia.
Komisioni Kombëtar për Zhvillim dhe Reforma njoftoi se çmimet maksimale të shitjes me pakicë për benzinën dhe naftën do të rriten përkatësisht me 1,160 juanë dhe 1,115 juanë për ton metrik, duke hyrë në fuqi nga mesnata e së hënës.
Ky institucion i rishikon çmimet çdo 10 ditë pune, duke reflektuar ndryshimet në tregjet ndërkombëtare të naftës, si dhe faktorë të tjerë si kostot e përpunimit, taksat dhe shpenzimet e shpërndarjes.
Sipas formulës ekzistuese, çmimet do të duhej të rriteshin edhe më shumë, por autoritetet vendosën të aplikojnë kontrolle të përkohshme për të lehtësuar barrën mbi konsumatorët dhe për të ruajtur stabilitetin ekonomik dhe social.
Rritja e çmimeve të naftës në tregjet ndërkombëtare lidhet me tensionet në Lindjen e Mesme, ku konflikti SHBA-Izrael me Iranin ka ndikuar drejtpërdrejt në furnizimin global me energji. Çmimi i naftës Brent arriti mbi 113 dollarë për fuçi, ndërsa ai amerikan West Texas Intermediate kaloi mbi 101 dollarë për fuçi.
