Grupi gjerman i medias Axel Springer njoftoi të premten se ka rënë dakord të blejë Telegraph Media Group të Britanisë për 575 milionë paund (rreth 766.3 milionë dollarë), duke i dhënë fund një periudhe të gjatë pasigurie për pronësinë e gazetës.
Marrëveshja prishi përpjekjen e pronarit të Daily Mail and General Trust (DMGT) për të blerë rivalin e saj, i cili kishte qenë nën hetime rregullatore në Britani për shkak të shqetësimeve rreth pluralizmit mediatik.
Axel Springer tha se do ruajë trashëgiminë e gazetës The Daily Telegraph ndërsa do krijojë një platformë për zgjerim, përfshirë në SHBA, dhe rikonfirmoi angazhimin për “gazetari të pavarur dhe me cilësi të lartë” si dhe për pluralizëm mediatik në Britani.
Pas blerjes së Politico në një marrëveshje me vlerë rreth 1 miliard dollarë në vitin 2021, blerja e Telegraph bëhet investimi i dytë më i madh i Axel Springer që nga themelimi i saj në vitin 1946, pas një përpjekjeje të pasuksesshme për të blerë gazetën në vitin 2004.
Negociata “të shpejta dhe efikase”
Drejtori ekzekutiv i Axel Springer, Mathias Döpfner, tha se zotërimi i Telegraph është “një privilegj dhe një përgjegjësi”.
Ai shtoi se grupi synon ta rrisë gazetën duke ruajtur karakterin e saj dhe duke e ndihmuar të bëhet “media e qendrës së djathtë më e lexuar dhe më frymëzuese intelektualisht në botën anglishtfolëse”.
Döpfner pranoi se stafi i Telegraph ka kaluar një periudhë të gjatë pasigurie dhe tha se botuesi synon “t’i japë fund kësaj pasigurie”.
Kompania i dha merita edhe botuesit të New York Sun, Dovid Efune, për mbështetjen në marrëveshje. Efune kishte udhëhequr një konsorcium me Axel Springer për të bërë ofertë për gazetat muajin e kaluar, por në fund Axel Springer e përfundoi marrëveshjen i vetëm.
RedBird IMI tha se ishte e kënaqur që arriti marrëveshje pas negociatave “të shpejta dhe efikase”.
“Me forcën e ofertës së tyre tregtare dhe një rrugë të qartë rregullatore drejt pronësisë, besojmë se Axel Springer është në pozicion të mirë për ta çuar Telegraph në kapitullin e ardhshëm,” tha kompania në një deklaratë.
Kompanitë thanë se tani po punojnë me qeverinë britanike për të marrë miratimet e nevojshme.
Ministrja britanike e Kulturës, Lisa Nandy, muajin e kaluar ndërhyri për të dërguar marrëveshjen e DMGT te rregullatorët për të shqyrtuar ndikimin në pluralizmin mediatik dhe konkurrencën, shkruan Reuters.
Një mosmarrëveshje e gjatë për pronësinë
Marrëveshja i jep fund një sagë që filloi në qershor 2023, kur Lloyds Banking Group mori praktikisht kontrollin e Telegraph pasi pronarët e saj prej kohësh, familja Barclay, nuk arritën të shlyenin borxhe prej 1.2 miliardë paundësh të garantuara me asetet e grupit mediatik.
RedBird IMI mori kontrollin pasi shlyeu një kredi prej 600 milionë paundësh ndaj Lloyds, por gazetat mbetën në një situatë të paqartë pasi Britania ndërmori hapa për të bllokuar përfshirjen e shteteve të huaja në pronësinë e gazetave kombëtare.
Më pas firma amerikane e investimeve RedBird Capital Partners u përpoq të blinte grupin, me International Media Investments (IMI), të mbështetur nga Abu Dabi, në një rol minoritar, por marrëveshja u rrëzua në nëntor 2025.
Oferta ishte ristrukturuar për t’u përputhur me rregullat e reja që kufizojnë pronësinë e shteteve të huaja në 15%, por u tërhoq për shkak të një procesi rregullator më të ngadaltë se sa pritej dhe kundërshtimeve të brendshme nga figura të larta të redaksisë së Telegraph.
Banka e investimeve LionTree shërbeu si këshilltare për Axel Springer në këtë marrëveshje.
