Mbrëmjen e së shtunës së kaluar, në rezidencën e tij në Beverly Hills, drejtuesi i Warner Bros. Discovery, David Zaslav, mori një telefonatë vendimtare nga David Ellison. Paramount kishte rritur ofertën me 1 dollar për aksion, duke e çuar vlerësimin total në 110 miliardë dollarë, si dhe kishte pranuar disa kushte kyçe që kishin mbetur pezull gjatë muajve të negociatave intensive.
Lufta për kontrollin e studios ikonike kishte nisur pesë muaj më herët, pikërisht në shtëpinë e Zaslav, kur Ellison kishte hedhur idenë e një marrëveshjeje, duke ndezur një proces ankandi që në dhjetor u duk se e fitoi Netflix. Megjithatë, pas manovrave strategjike dhe ofertave të njëpasnjëshme, avantazhi kaloi sërish te Paramount. Vendimi përfundimtar erdhi të enjten, kur Netflix refuzoi të përmirësonte ofertën dhe u tërhoq, ndërsa drejtuesit e Paramount festuan në ambientet e studios në Hollywood.
Nëse marrëveshja merr dritën jeshile nga autoritetet, ajo do të ndryshojë rrënjësisht hartën e industrisë së argëtimit, duke bashkuar nën një strukturë të vetme asete të mëdha si CBS, CNN dhe operacionet amerikane të TikTok. Kompania e re do të jetë nën kontrollin e familjes së Larry Ellison, themelues i Oracle Corporation dhe një prej individëve më të pasur globalisht, i njohur për afërsinë me Donald Trump.
Për familjen Ellison, transaksioni shihej si i domosdoshëm për të garantuar konkurrueshmërinë e Paramount në një treg të dominuar nga platforma teknologjike si Amazon dhe YouTube. Sipas burimeve pranë negociatave, Warner ishte një aset që Netflix e dëshironte, por nuk e konsideronte jetik; për Paramount-in, ishte çështje ekzistence.
David Ellison, 43 vjeç, me mbështetjen financiare të të atit, ka konsoliduar shpejt pozicionin e tij në Hollywood, fillimisht përmes bashkimit të Skydance Media me Paramount-in dhe tani duke triumfuar ndaj një gjiganti me kapitalizim rreth 400 miliardë dollarë si Netflix.
Marrëveshja i jep atij kontroll mbi dy studio me histori shekullore dhe mbi shërbime transmetimi si HBO Max dhe Paramount+, krahas operacioneve të lajmeve kombëtare. Bashkimi pritet të shkaktojë ristrukturime të thella dhe, potencialisht, shkurtime të konsiderueshme të vendeve të punës.
Në anën tjetër, bashkëdrejtori i përgjithshëm i Netflix-it, Ted Sarandos, ndodhej në Uashington kur drejtori financiar Spencer Neumann njoftoi drejtuesit e WBD-së se kompania nuk do ta rriste ofertën prej 27.75 dollarësh për aksion. Sarandos e kishte përkufizuar marrëveshjen si një mundësi tërheqëse në çmimin e duhur, por jo si një domosdoshmëri strategjike me çdo kusht. Edhe pse Paramount kishte parë tetë oferta të refuzuara, familja Ellison nuk hoqi dorë, duke e konsideruar çmimin final si kritik për pozicionimin afatgjatë në industri.
Paramount, në partneritet me Gerry Cardinale të RedBird Capital Partners, aplikoi një strategji presioni maksimal: ofertë të drejtpërdrejtë ndaj aksionerëve dhe kërcënim për betejë përfaqësimi. Gjatë fundjavës së Presidentëve, bordi i WBD-së kërkoi një ofertë “më të mirë dhe përfundimtare” për të kapërcyer propozimin 83 miliardë dollarësh të Netflix-it. Kështu lindi oferta finale e koduar “Projekti Luftëtari”.
Një element vendimtar ishte garancia financiare personale (equity backstop) e Larry Ellison-it, që i dha bordit sigurinë se transaksioni mund të mbyllej pavarësisht nivelit të lartë të borxhit të Paramount-it. Oferta u përmirësua me stimuj shtesë dhe me mekanizma për të zbutur rreziqet që lidhen me rënien strukturore të televizionit tradicional. Paralelisht, kompania kaloi një pengesë të rëndësishme antitrust, duke sinjalizuar mbështetje politike nga administrata Trump, çka për investitorët përkthehej në probabilitet më të lartë realizimi.
Netflix, ndonëse u tërhoq, përfitoi një tarifë ndërprerjeje prej 2.7 miliardë dollarësh, ndërsa aksionet e saj u rritën ndjeshëm pas njoftimit. Shqetësimet rregullatore kishin rënduar mbi ofertën e saj, veçanërisht pas sinjaleve se një bashkim i tillë mund të forconte tepër pozitën e kompanisë në treg.
Çmimi final prej 110 miliardë dollarësh përbën një arritje të konsiderueshme për Zaslav, i cili arriti të nxisë konkurrencë të drejtpërdrejtë mes dy ofertuesve, duke e ngritur ofertën nga 19 në 31 dollarë për aksion. Megjithatë, kompania e bashkuar do të mbartë një barrë të rëndë borxhi dhe do të mbështetet në fuqinë financiare të familjes Ellison dhe kapitalit nga fondet sovrane të Lindjes së Mesme. Tashmë sfida kalon nga negociatat te integrimi operacional: bashkimi i dy studiove historike dhe përballimi i rënies strukturore të televizionit linear, ndërsa industria përgatitet për një fazë të re konsolidimi dhe racionalizimi të kostove, shkruan FT.
