Portugalia po zhvillon këtë të diel raundin e dytë të zgjedhjeve presidenciale, ku qytetarët zgjedhin mes kandidatit të qendrës së majtë nga Partia Socialiste (PS), António José Seguro, dhe liderit të partisë populiste të ekstremit të djathtë Chega, André Ventura. Procesi zgjedhor po zhvillohet nën hijen e stuhive të forta që kanë goditur vendin ditët e fundit, përcjell Euronews.
Rreth 11 milionë qytetarë në Portugali dhe jashtë saj kanë të drejtë vote, ndërsa rezultatet e para nga sondazhet e daljes priten rreth orës 20:00 me orën lokale (21:00 CET). Sipas pritshmërive, Seguro shihet si favorit për të fituar përballë Venturës, partia e të cilit u themelua në vitin 2019 dhe aktualisht është forca më e madhe opozitare në Parlament.
Në raundin e parë, António José Seguro mori 31.1% të votave, ndërsa André Ventura 23.52%. Asnjëri nuk arriti të sigurojë mbi 50% të votave, duke e çuar procesin në balotazh.
Ky është raundi i dytë presidencial i parë në Portugali pas 40 vitesh. Herën e fundit që zgjedhjet shkuan në balotazh ishte në vitin 1986, kur Mário Soares i Partisë Socialiste mposhti liderin konservator të CDS-së, Diogo Freitas do Amaral, pas një përmbysjeje historike mes dy raundeve.
Katër dekada më vonë, skena politike portugeze po përballet sërish me ndryshime të rëndësishme. Rezultati i fortë i Venturës në raundin e parë shihet si pjesë e trendit më të gjerë të rritjes së së djathtës ekstreme në Evropë, ku partitë populiste po fitojnë gjithnjë e më shumë terren.
Nga ana tjetër, Seguro është paraqitur si një kandidat i moderuar, që synon stabilitetin e institucioneve demokratike dhe bashkëpunimin me qeverinë aktuale minoritare të qendrës së djathtë.
Votimi i sotëm pritet të përcaktojë jo vetëm presidentin e ardhshëm të Portugalisë, por edhe drejtimin politik të vendit në një periudhë sfiduese për demokracinë evropiane.
