Kina u ka dhënë dritën jeshile tre prej kompanive më të mëdha teknologjike të saj – ByteDance, Alibaba dhe Tencent – për të blerë çipet e inteligjencës artificiale H200 të kompanisë amerikane Nvidia, thanë për Reuters katër burime të njohura me çështjen, duke sinjalizuar një ndryshim të qëndrimit të Pekinit teksa kërkon të balancojë nevojat për zhvillimin e inteligjencës artificiale me nxitjen e prodhimit vendas të gjysmëpërçuesve.
Sipas burimeve, ByteDance, Alibaba dhe Tencent janë miratuar për të blerë në total më shumë se 400 mijë çipe H200, ndërsa kompani të tjera janë futur tashmë në radhë për miratime të mëvonshme. Burimet folën në kushte anonimiteti për shkak të ndjeshmërisë së çështjes.
Megjithatë, miratimet po jepen me kushte dhe, sipas burimeve, këto kushte ende janë në proces përcaktimi.
Një burim i pestë tha se licencat janë tepër kufizuese dhe se klientët nuk i kanë shndërruar ende miratimet në porosi konkrete blerjeje.
Një nga burimet bëri të ditur se miratimet rregullatore u dhanë gjatë vizitës së kësaj jave në Kinë të drejtorit ekzekutiv të Nvidia, Jensen Huang.
Ministritë kineze të industrisë dhe tregtisë, si dhe Nvidia, nuk iu përgjigjën kërkesave për koment në momentin e publikimit. Edhe ByteDance, Alibaba dhe Tencent nuk dhanë përgjigje.
Zyrtarë të qeverisë kineze u kanë thënë më herët kompanive vendase të teknologjisë se duhet të blejnë çipe vetëm kur është e domosdoshme, ka raportuar Reuters.
Një propozim i diskutuar në të kaluarën nga autoritetet kineze parashikonte që çdo blerje e çipeve H200 të shoqërohej me një raport të caktuar blerjeje të çipeve vendase.
Çipi H200, i dyti më i fuqishëm i Nvidia për inteligjencën artificiale, është kthyer në një pikë të nxehtë në marrëdhëniet SHBA-Kinë. Pavarësisht kërkesës së fortë nga kompanitë kineze dhe miratimit nga ana e SHBA-së për eksportet, hezitimi i Pekinit për të lejuar importet ka qenë pengesa kryesore për dërgesat.
Shtetet e Bashkuara, më herët këtë muaj, hapën zyrtarisht rrugën që Nvidia të shesë H200 në Kinë, ku kompania po përballet me interes të madh. Megjithatë, autoritetet kineze kanë fjalën e fundit nëse do të lejojnë që këto çipe të futen në vend.
Në javët e fundit ka pasur paqartësi nëse Pekini do të jepte miratimin, pasi qeveria kërkon të balancojë kërkesën në rritje për çipe të avancuara të inteligjencës artificiale dhe nevojën për të forcuar industrinë vendase të gjysmëpërçuesve.
Autoritetet doganore kineze u kishin thënë më herët agjentëve se çipet H200 nuk lejoheshin të hynin në Kinë, raportoi Reuters këtë muaj. Ndërkohë, kompanitë kineze të teknologjisë kanë vendosur porosi për më shumë se dy milionë çipe H200, shumë më tepër sesa kapaciteti aktual i furnizimit i Nvidia, sipas një raportimi të muajit të kaluar.
Mbetet e paqartë se sa kompani të tjera do të marrin miratim në fazat e ardhshme dhe cilat kritere po përdor Pekini për të përcaktuar përfituesit.
Jensen Huang mbërriti në Shangai të premten e kaluar për aktivitetet vjetore me punonjësit e Nvidia në Kinë dhe më pas ka udhëtuar drejt Pekinit dhe qyteteve të tjera, sipas Reuters.
Miratimi i çipeve H200 sugjeron se Pekini po i jep përparësi nevojave të kompanive të mëdha të internetit, të cilat po shpenzojnë miliarda dollarë për ndërtimin e qendrave të të dhënave të nevojshme për zhvillimin e shërbimeve të inteligjencës artificiale dhe për të konkurruar me rivalët amerikanë, përfshirë OpenAI.
Edhe pse kompani kineze si Huawei tashmë kanë produkte që rivalizojnë performancën e çipit H20 të Nvidia – më i avancuari që lejohej më parë të shitej në Kinë – ato ende mbeten shumë prapa H200.
Çipi H200 ofron rreth gjashtë herë më shumë performancë sesa H20.
Megjithatë, Pekini ka diskutuar edhe më parë mundësinë që kompanitë të detyrohen të blejnë një kuotë të caktuar çipesh vendase si kusht për të marrë miratim për importin e gjysmëpërçuesve të huaj.
