Politikani i Partisë Laburiste, Andy Burnham, u ndalua të dielën të kandidojë për të rikthyer vendin e tij në parlament, në një vendim që shihet si një lëvizje politike nga Kryeministri Keir Starmer dhe aleatët e tij për të penguar një rival potencial brenda partisë, përcjell Reuters.
Burnham, kryebashkiak i Manchesterit dhe një nga figurat më të njohura të Laburistëve, kishte shprehur dëshirën për të kandiduar për vendin e liruar nga një ligjvënës që dha dorëheqjen të enjten e kaluar. Megjithatë, Komiteti Ekzekutiv Kombëtar i partisë (NEC) e refuzoi kandidaturën e tij me votim 8 me 1, duke përfshirë edhe Starmer. Ky vendim e privoi Burnham nga mundësia për të përdorur këtë post si platformë për një sfidë të mundshme ndaj udhëheqësit të partisë.
Partia Laburiste arsyetoi vendimin duke thënë se ishte në interes të partisë për të shmangur një zgjedhje të panevojshme për kryebashkiakun e Manchesterit dhe për të kursyer fondet e tatimpaguesve dhe të partisë.
Vendimi ka shkaktuar reagime të forta brenda radhëve të Laburistëve. John McDonnell, ligjvënës me orientim të majtë, e kritikoi Starmer duke e quajtur veprimin “frikacak” dhe paralajmëroi se kjo mund të përshpejtojë rënien e tij politike.
Andy Burnham ka kritikuar më parë udhëheqjen e Starmer, por ka siguruar se synonte të mbështeste punën e qeverisë dhe jo ta minonte atë. Ai mbetet një figurë influente për disa grupe të majta brenda Laburistëve, veçanërisht për ata kritik ndaj qendrave politike të Starmer.
Partia Laburiste aktualisht po përballet me vështirësi në sondazhe, duke qëndruar pas partisë populiste të djathtë Reform UK, ndërsa zgjedhjet lokale të majit pritet të jenë një test i rëndësishëm për besueshmërinë e saj.
