Aktorja suedeze May Britt, e njohur për karrierën e saj në kinemanë europiane dhe hollivudiane si edhe për martesën historike me Sammy Davis Jr, e cila në vitin 1960 shkaktoi polemika të forta për shkak të qëndrimeve racore në SHBA, ka ndërruar jetë në moshën 91-vjeçare. Lajmin e ka konfirmuar djali i saj, Mark Davis, për The Guardian, duke bërë të ditur se May Britt u nda nga jeta më 11 dhjetor për shkaqe natyrale, në qendrën mjekësore Providence Cedars-Sinai Tarzana në Los Angeles.
May Britt lindi me emrin Maj-Britt Wilkens në Suedi në vitin 1934. Hyrja e saj në botën e aktrimit erdhi krejt rastësisht, ndërsa punonte si asistente e një fotografi në Stokholm, ku u vu re nga kineastët italianë Carlo Ponti dhe Mario Soldati. Ata i ofruan rolin kryesor në filmin aventuresk italian të vitit 1953 “Jolanda, the Daughter of the Black Corsair”, që shënoi edhe debutimin e saj në kinematografi. Pas këtij filmi, ajo u përfshi në disa prodhime italiane, duke ndërtuar gradualisht profilin e saj artistik.
Karriera e saj mori hov ndërkombëtar në vitin 1956, kur u përzgjodh për të luajtur në adaptimin kinematografik të “War and Peace”, me regji të King Vidor dhe me Audrey Hepburn në rolin kryesor. Interpretimi i Britt tërhoqi vëmendjen e drejtuesit të studios 20th Century Fox, Buddy Adler, i cili i ofroi asaj një kontratë. Në fund të viteve ’50, ajo emigroi në SHBA dhe luajti përkrah emrave të mëdhenj të Hollivudit si Marlon Brando në filmin “The Young Lions” dhe Robert Mitchum në “The Hunters”.
Roli që e konsolidoi si yll ishte ai i kabaretistes Lola-Lola në filmin “The Blue Angel” të vitit 1959. Po atë vit, May Britt u shfaq edhe në kopertinën e revistës “Life”, me titullin “May Britt: Star With a New Style”, duke u konsideruar një nga figurat më elegante dhe moderne të kinemasë së asaj kohe.
Në jetën personale, Britt u martua fillimisht në vitin 1958 me Edward Gregson, por martesa zgjati pak dhe çifti u nda në fund të vitit 1959. Po atë vit, ajo njohu Sammy Davis Jr dhe në nëntor 1960 u martuan, pasi Britt u konvertua në judaizëm. Në atë periudhë, martesa ndërracore ishte ende e ndaluar në shumicën e shteteve amerikane dhe lidhja e tyre u shoqërua me reagime të ashpra, presion mediatik, kërcënime me vdekje dhe sulme raciste.
Sammy Davis Jr, i angazhuar në fushatën presidenciale të John F. Kennedy-t, kishte rënë dakord ta shtynte martesën deri pas zgjedhjeve të vitit 1960 për të shmangur polemikat. Megjithatë, pas martesës, çifti u përjashtua nga gala e inaugurimit presidencial në vitin 1961. Vajza e tyre, Tracey Davis, ka treguar më vonë se familja jetoi për një kohë të gjatë nën masa sigurie, për shkak të frikës nga sulmet dhe kërcënimet.
Pas martesës me Davis, karriera e May Britt në Hollivud u ndërpre, pasi 20th Century Fox refuzoi të rinovonte kontratën e saj. Ajo u tërhoq nga aktrimi për t’iu përkushtuar familjes, një zgjedhje që, sipas saj, nuk e ka penduar kurrë. Në një intervistë për “Vanity Fair” në vitin 1999, Britt është shprehur se dashuria për Sammy Davis Jr ishte më e rëndësishme se çdo sukses profesional.
Çifti qëndroi së bashku për shtatë vjet dhe, përveç vajzës së tyre Tracey, adoptuan edhe dy djem, Mark dhe Jeff. Ata u ndanë në vitin 1967 dhe u divorcuan në vitin 1968, mes zërave për një lidhje të Davis me balerinën Lola Falana. Pas divorcit, Britt iu rikthye aktrimit me role më të vogla në televizione dhe filma, ndërsa roli i saj i fundit daton në vitin 1988, në një episod të serialit “Probe”.
Në vitin 1993, May Britt u martua me Lennart Ringquist, drejtues në industrinë e argëtimit dhe mbarështues kuajsh, i cili ndërroi jetë në janar të vitit 2017. Ajo lë pas dy djemtë e saj, motrën Margot dhe disa nipër e mbesa. Vajza e saj, Tracey Davis, vdiq në nëntor të vitit 2020, në moshën 59-vjeçare. May Britt do të kujtohet jo vetëm si aktore, por edhe si një figurë që sfidoi hapur paragjykimet racore të kohës së saj dhe pagoi një çmim të lartë personal për zgjedhjet e saj.
