Zyrtarë të lartë të Shtëpisë së Bardhë besojnë se disa udhëheqës evropianë po e mbështesin publikisht përpjekjen e presidentit Trump për t’i dhënë fund luftës në Ukrainë, ndërsa përpiqen në heshtje të zhbëjnë progresin prapa skenave që nga samiti i Alaskës, ka mësuar Axios.
Shtëpia e Bardhë i ka kërkuar Departamentit të Thesarit të hartojë një listë sanksionesh që mund të vendosen nga Evropa kundër Rusisë.
Dy javë pas samitit midis presidentit Trump dhe presidentit rus Putin, ka pasur pak progres të qartë drejt përfundimit të luftës. Ndihmësit e frustruar të Trump pretendojnë se faji duhet të bjerë mbi aleatët evropianë, jo mbi Trump apo edhe mbi presidentin rus Putin.
Zyrtarët e Shtëpisë së Bardhë po humbasin durimin me udhëheqësit evropianë, të cilët pretendojnë se po e shtyjnë Ukrainën të kërkojë lëshime territoriale jorealiste nga Rusia.
Axios ka mësuar se sanksionet që SHBA-të po i kërkojnë Evropës të miratojë kundër Rusisë përfshijnë një ndërprerje të plotë të të gjitha blerjeve të naftës dhe gazit – plus tarifa dytësore nga BE-ja për Indinë dhe Kinën, të ngjashme me ato që SHBA-të tashmë i kanë vendosur Indisë.
“Evropianët nuk kanë të drejtë ta zgjasin këtë luftë dhe të kërkojnë pritje të paarsyeshme, ndërkohë që presin që Amerika të mbajë koston,” tha një zyrtar i lartë i Shtëpisë së Bardhë për Axios.
“Nëse Evropa dëshiron ta përshkallëzojë këtë luftë, kjo do varet prej tyre.”
Thuhet se evropianët po e shtyjnë Zelensky-n të presë për një “marrëveshje më të mirë” – një qasje maksimaliste që e ka përkeqësuar luftën, argumenton rrethi i ngushtë i Trump.
Zyrtarët amerikanë besojnë se zyrtarët britanikë dhe francezë janë më konstruktivë. Por ata ankohen se vendet e tjera të mëdha evropiane duan që SHBA-të të mbajnë koston e plotë të luftës, ndërkohë që vetë nuk duan të shpenzojnë shumë.
“Arritja e një marrëveshjeje është arti i të mundshmes”, tha zyrtari i lartë.
“Por disa nga evropianët vijojnë të veprojnë sikur bëhet fjalë për një përrallë ndërkohë anashkalojnë faktin se duhen dy për të kërcyer tango”.
Pas samiteve të tij me Putinin dhe presidentin ukrainas Zelensky, Trump ka thënë vijimësisht se hapi tjetër duhet të jetë një samit Putin-Zelensky. Deri më tani, rusët kanë kundërshtuar. Në të njëjtën kohë, ukrainasit kanë hedhur poshtë çdo diskutim mbi lëshime të mundshme territoriale nëse rusët nuk vijnë në tryezën e bisedimeve.
Trump ishte dukshëm i zemëruar për gjendjen gjatë mbledhjes së kabinetit të së martës.
Sulmet e mëdha ajrore të Rusisë në Kiev, plus sulmet ukrainase ndaj rafinerive ruse të naftës, sinjalizuan më tej se paqja nuk po afrohej më.
“Ndoshta të dyja palët e kësaj lufte nuk janë gati ta përfundojnë vetë. Presidenti dëshiron që ajo të përfundojë, por udhëheqësit e këtyre dy vendeve kanë nevojë që ajo të përfundojë dhe duhet të duan që ajo të përfundojë gjithashtu”, tha të enjten sekretarja e shtypit e Shtëpisë së Bardhë, Karoline Leavitt.
Një zyrtar i lartë i Shtëpisë së Bardhë i tha Axios se Trump po e shqyrton seriozisht tërheqjen nga përpjekjet diplomatike derisa njëra ose të dyja palët të fillojnë të tregojnë më shumë përkulshmëri.
“Do ulemi dhe të shikojmë. Le të luftojnë për ca kohë dhe të shohim se çfarë ndodh”, tha zyrtari.
Disa zyrtarë amerikanë kanë filluar t’i shohin udhëheqësit evropianë si një pengesë të madhe, pavarësisht faktit se Trump zhvilloi një takim miqësor me ta dhe Zelenskyn më pak se dy javë më parë.
Një zyrtar i lartë evropian i përfshirë në bisedimet me SHBA-në mbi luftën Ukrainë-Rusi shprehu habi për kritikat e SHBA-së.
Zyrtari u habit nga sugjerimi se udhëheqësit evropianë ndryshe po i flisnin Trump-it përballë dhe dryshe po silleshin pas shpinës së tij, duke thënë se në realitet nuk ekzistonin boshllëqe të tilla.
Zyrtari tha gjithashtu se vendet evropiane tashmë po punojnë për një sërë sanksionesh të reja kundër Rusisë.
Të premten, i dërguari i Trump-it, Steve Witkoff, dhe shefi i stafit të Zelenskyt, Andriy Yermak, u takuan në Nju Jork.
Ata diskutuan takimin e mundshëm Zelensky-Putin dhe Yermak e ftoi Witkoff-in për një vizitë të parë në Kiev, por nuk u bë ndonjë përparim i rëndësishëm, tha një burim me njohuri për takimin.
VINI RE: Ky material është pronësi intelektuale e Axios
