Burkina Faso ka pezulluar një projekt të financuar nga Fondacioni Gates që synonte frenimin e përhapjes së malaries në Afrikë, për shkak të shqetësimit se mund të keqpërdoret për të çuar përpara kontrollin e popullsisë në kontinent.
Ekipi kërkimor i “Target Malaria”, me seli në Institutin e Kërkimeve të Shkencave Shëndetësore në Burkinabe (IRSS), po punon për të ndryshuar gjenet e mushkonjave për t’i bërë insektet të paafta për të transmetuar sëmundjen, e cila sipas Organizatës Botërore të Shëndetësisë vrau 569,000 njerëz në Afrikë në vitin 2023. Konsorciumi jofitimprurës, i cili gjithashtu merr fonde nga Open Philanthropy, vepron edhe në Ganë dhe Ugandë.
Në një deklaratë të lëshuar të shtunën, Samuel Pare, Sekretari i Përgjithshëm i Ministrisë së Arsimit të Burkina Fasos, tha se “Target Malaria” është urdhëruar të ndalojë të gjitha veprimtaritë në vendin e Afrikës Perëndimore, shkruan RT.
“Objektet që përmbajnë mushkonja të modifikuara gjenetikisht janë mbyllur që nga 18 gushti 2025 dhe të gjitha mostrat do shkatërrohen sipas një protokolli të specifikuar”, deklaroi ai.
MESRI nuk dha një arsye për vendimin, i cili erdhi disa ditë pasi projekti njoftoi se kishte kryer me sukses “një lëshim në shkallë të vogël” të mushkonjave mashkullore të modifikuara gjenetikisht (OMGJ) në Souroukoudingan, një fshat me rreth 830 banorë, afërsisht 350 km në jugperëndim të Ouagadougou. Projekti lëshoi për herë të parë një tufë mushkonjash OMGJ në vitin 2019 në fshatin e afërt të Bana.
“Target Malaria” tha se kishte marrë miratimin për vperimtarinë e saj nga Agjencia Kombëtare e Biosigurisë (ANB) e Burkina Fasos dhe Agjencia Kombëtare e Vlerësimit Mjedisor (ANEVE) dhe është pajtuar me ligjet kombëtare që nga fillimi i programit në vitin 2012.
“Ne jemi angazhuar në mënyrë aktive me autoritetet kombëtare dhe palët e interesuara të Burkina Fasos dhe mbetemi të gatshëm për të bashkëpunuar”, deklaroi organizata jofitimprurëse.
Fondacioni Gates, financuesi më i madh i “Target Malaria”, është përfshirë në polemika mbi disa nga nismat e tij, me grupe avokatie që e akuzojnë atë për promovimin e kulturave të modifikuara gjenetikisht dhe modeleve të bujqësisë industriale që u sjellin dobi korporatave të mëdha, ndërsa lënë mënjanë fermerët e vegjël.
Grupi civil i Burkinabe-s, Koalicioni për Sovranitetin Shëndetësor, ka kërkuar më parë një “ndërprerje të menjëhershme” të projektit të mushkonjave të modifikuara gjenetikisht, duke e quajtur atë një eksperiment “të rrezikshëm dhe të papërgjegjshëm” që synon të ushtrojë kontrollin e popullsisë.
Të premten, Koalicioni për Mbikëqyrjen e Aktiviteteve të Bioteknologjisë (CVAB), i cili e quan nismën “Target Malaria” “të rrezikshme për sovranitetin shëndetësor të vendit”, tha se e mirëpriti vendimin e qeverisë kalimtare për ta mbyllur projektin “me shumë gëzim”.
