Kandidati presidencial bolivian, senatori i qendrës Rodrigo Paz i Partisë Demokristiane, në La Paz, Bolivi, 17 gusht 2025
Senatori i qendrës, Rodrigo Paz, kryesonte zgjedhjet presidenciale të Bolivisë të dielën vonë, sipas rezultateve të hershme zyrtare, të cilat treguan se Lëvizja për Socializëm (MAS) në pushtet është drejt humbjes më të keqe zgjedhore në një brez.
Paz i Partisë Demokristiane kishte siguruar 32.18% të votave, ndërsa Eduardo del Castillo i MAS kishte vetëm 3.16%, sipas rezultateve fillestare të publikuara nga gjykata zgjedhore të dielën në mbrëmje.
Ish-presidenti konservator Jorge “Tuto” Quiroga i koalicionit Alianza doli i dyti me 26.94% të votave.
“Bolivia nuk po kërkon vetëm një ndryshim në qeveri, por po kërkon një ndryshim në sistemin politik”, tha Paz në një fjalim të transmetuar të dielën në mbrëmje.
“Ky është fillimi i një fitoreje të madhe, i një shndërrimi të madh”, shtoi ai, ndërsa mbështetësit e tij brohorisnin “ripërtëritje”.
Më herët të dielën, Quiroga pranoi rezultatet, duke konfirmuar vendin e tij në balotazh dhe e uroi Paz për rezultatin. Presidenti në largim Luis Arce lëshoi një deklaratë optimiste duke njohur rezultatet. “Demokracia ka triumfuar”, thuhej në deklaratë.
Nëse asnjë kandidat presidencial nuk merr më shumë se 40% të votave me një epërsi prej 10 pikësh, zgjedhjet do vendosen në një balotazh më 19 tetor. Rezultatet e plota zyrtare do të shpallen brenda shtatë ditësh.
Paraqitja e fortë e Paz i habiti analistët. Sondazhet e opinionit kishin sugjeruar se senatori, me afërsisht 10% mbështetje, ishte shumë prapa Quirogas dhe kandidatit të qendrës së djathtë Samuel Doria Medina të koalicionit Unidad Alliance. Biznesmeni Medina pranoi humbjen të dielën dhe tha se do mbështeste Paz në një balotazh të mundshëm, shkruan Reuters.
Zgjedhjet e përgjithshme të së dielës janë lënë në hije nga inflacioni në nivelin më të lartë në katër dekada dhe mungesa e ish-presidentit të majtë Evo Morales, të cilit iu ndalua të kandidonte dhe kritikoi votimin.
Por thirrjet e Morales për të bojkotuar zgjedhjet duket se nuk u përmbushën.
Pjesëmarrja në votime të dielën ishte e qëndrueshme, thanë autoritetet. Pavarësisht shqetësimeve të mëparshme se procesi zgjedhor mund të pengohej nga mbështetësit e Morales, të cilët i kishin bërë thirrje publikut të braktiste garën, vëzhguesit ndërkombëtarë thanë se nuk pati ndërprerje të mëdha.
Disa incidente të vogla ndodhën në qendrat e votimit në rajonin qendror të Cochabamba, bastioni politik i Morales.
Me një fushë të mbushur me tetë kandidatë dhe asnjë kandidat mbizotërues të partisë MAS, zgjedhjet shënuan një “çast udhëkryq” për Bolivinë, tha analisti i Andeve Jugore, Glaeldys Gonzalez Calanche i Grupit Ndërkombëtar të Krizave.
