Administrata e presidentit të SHBA-së, Donald Trump, po dekurajon qeveritë nga pjesëmarrja në konferencën e ardhshme të OKB-së në Nju Jork, e cila synon të përcaktojë parametrat për një zgjidhje me dy shtete mes Izraelit dhe Palestinës, përcjell JP.
Sipas një kabllogrami diplomatik të dërguar të martën, vendet që ndërmarrin “veprime anti-Izrael” pas konferencës mund të përballen me pasoja diplomatike nga Uashingtoni. Ky qëndrim bie ndesh me diplomacinë e dy aleatëve të ngushtë të SHBA-së, Francës dhe Arabisë Saudite, të cilët janë bashkë-organizatorë të takimit.
Kabllogrami thekson se SHBA kundërshton çdo hap që do të njihte në mënyrë të njëanshme një shtet palestinez, duke argumentuar se kjo do të krijonte pengesa ligjore dhe politike për zgjidhjen e konfliktit dhe mund të detyronte Izraelin të lëshonte terren gjatë luftës.
Presidenti francez Emmanuel Macron ka sugjeruar se Franca mund të njohë një shtet palestinez në konferencë, ndërsa zyrtarët francezë po përpiqen të shmangin një përplasje me SHBA-në, aleatin më të fortë të Izraelit.
Ndërkohë, Britania dhe Kanadaja, së bashku me vende të tjera, kanë vendosur sanksione ndaj dy ministrave të ekstremit të djathtë në qeverinë izraelite, duke rritur presionin mbi Kryeministrin Benjamin Netanyahu për t’i dhënë fund luftës në Gaza.
Izraeli ka kritikuar ashpër konferencën, duke argumentuar se ajo shpërblen Hamasin për sulmin e 7 tetorit 2023, i cili shkaktoi luftën në Gaza.
Departamenti i Shtetit i SHBA-së dhe Ministria e Jashtme e Francës nuk kanë reaguar ende ndaj kërkesave për koment.
