Në Kuvend, kreu i PS Taulant Balla tha se opozita po përballet me vështirësi të brendshme dhe se protestuesit “u kanë marrë sheshin”, duke shtuar se disa deputetë të PD-së, sipas tij, kërkojnë t’u bashkohen protestuesve.
Ai theksoi gjithashtu se axhendën e parlamentit e përcakton vetëm vota dhe interesi kombëtar, ndërsa shtoi se “parlamenti është vendi ku argumenti duhet të mbizotërojë mbi forcën”.
Në fund, ai deklaroi se Partia Socialiste nuk mund të mposhtet nga protestat, duke thënë: “Partinë Socialiste të Shqipërisë nuk e mund dot askush”.
“Axhendën e parlamentit e përcakton vetëm vota dhe interesi kombëtar. Demokracia është sistem që merr frymë vetëm përmes parlamentarizmit.
Parlamenti është vendi ku forca e argumentit duhet të mbizotërojë mbi argumentin e forcës. Mua më duket se ju po vuani nga sindroma e Stokholmit.
Ju kanë marrë sheshin dhe doni që të bashkoheni me ata që ju kanë marrë sheshin, edhe pse ata ju anatemojnë udhëheqësin. Dëgjova këtu një deputetin tuaj që në një lojë fjalësh për emrat e forcave tona politike, ra në kurthin e harresës mbi faktin se sot në krye të PD është një sekretar partie.
I vetmi sekretar partie në krye të një partie politike sot në Shqipëri. Njëkohësisht edhe varkëtari i Enver Hoxhës që gëzohej kur ai i jepte dorën. Mes jush, edhe nga ata që gëzojnë kur thirret “Berisha në burg.” Ka mes jush nga ata që doni të ikë Saliu dhe shpresoni ta bëjë protesta.
Juve protesta ju mundi, por ne protesta nuk na mund dot. Partinë Socialiste të Shqipërisë nuk e mund dot askush”, tha Balla.
