Kryeministri Edi Rama ka kritikuar disa kryetarë bashkish, duke i paralajmëruar që të mos qëndrojnë në Tiranë gjatë javës dhe të jenë më të pranishëm në territoret që drejtojnë.
Gjatë një takimi me drejtues vendorë, Rama u shpreh se disa kryebashkiakë po neglizhojnë detyrat e tyre në komunitet, duke u zhvendosur shpesh në kryeqytet edhe në ditë pune.
Sipas tij, kjo praktikë duhet të marrë fund dhe nuk duhet të përsëritet, pasi krijon probleme në funksionimin e bashkive dhe në shërbimin ndaj qytetarëve.
“Kjo praktikë duhet të marrë fund. Nuk janë të gjithë, por janë disa. … Kjo nuk është e justifikueshme dhe nuk është e pranueshme. Besoj që kam mirëkuptimin tuaj për ta adresuar sa më shpejt këtë shqetësim, i cili më ka ardhur në mënyrë të përsëritur nga disa komunitete, kryesisht në juglindje të vendit”, u shpreh Rama.
Ai shtoi se disa kryebashkiakë po lënë pas dore detyrat në terren dhe po qëndrojnë në Tiranë në mënyrë të pajustifikuar gjatë javës.
Në deklaratën e tij, Rama bëri gjithashtu krahasime mes disa grupeve politike dhe përmendi se kritikat lidhen kryesisht me disa të zgjedhur të Partisë Socialiste në zonën Tiranë–Korçë, duke theksuar se përjashtohen drejtuesit që, sipas tij, janë shembull në ushtrimin e detyrës.
