Kryetari i Partisë Demokratike, Sali Berisha, ka bërë akuza të forta ndaj kryeministrit Edi Rama, duke pretenduar se në jug të vendit janë planifikuar qindra projekte turistike, për të cilat mungon transparenca mbi investitorët dhe zhvilluesit realë.
Në një deklaratë për mediat, Berisha tha se Rama ka projektuar 523 resorte dhe hotele në zonat turistike të Shqipërisë, ndërsa sipas tij 53 prej tyre janë në ndërtim dhe 47 të tjera presin miratimin e lejeve.
Sipas kreut të PD-së, këto projekte janë pjesë e një dokumenti që ai e cilësoi si të mbajtur të fshehtë nga publiku.
“Rama ka projektuar 523 resorte, hotele në zonat turistike, nga të cilat njëlloj si të ishte pronë e tij përjashton të gjithë infrastrukturën gjigante 10 vite nga taksat. A ka shfrytëzim më të egër se ky?”, deklaroi Berisha.
Berisha pretendoi se në shumë prej projekteve nuk identifikohen zhvilluesit dhe investitorët e vërtetë, ndërsa akuzoi se pas tyre fshihen persona me rekorde kriminale.
Ai përmendi emrat e Salvador Aliut dhe Franc Çopjës, duke pretenduar se ata janë të përfshirë në një pjesë të projekteve turistike të planifikuara.
Kreu i opozitës u ndal veçanërisht te një projekt i parashikuar në Kanioni i Gjipesë, për të cilin tha se është përfshirë edhe në një proces gjyqësor pas deklaratave të mëparshme publike.
Sipas Berishës, në zonën e Vunoit janë blerë rreth 15 mijë metra katrorë tokë nga Salvador Aliu, ndërsa ai pretendoi se mungojnë të dhënat mbi shitësit e këtyre parcelave.
Ai akuzoi gjithashtu qeverinë për mungesë transparence në lidhje me projektet që, sipas tij, po zhvillohen në zona me rëndësi të veçantë natyrore dhe turistike.
“Projekti nuk ka zhvillues dhe nuk thuhet se ku do të ndërtohet. Në 523 projektet e këtij libri, 53 janë në ndërtim dhe 47 presin leje”, deklaroi Berisha.
Në fund të deklaratës së tij, Berisha i bëri thirrje institucioneve ndërkombëtare të drejtësisë dhe zbatimit të ligjit që të hetojnë projektet turistike që ai përmendi.
Ai kërkoi përfshirjen e Europol, Eurojust dhe Interpol për verifikimin e transaksioneve dhe investimeve të lidhura me këto projekte.
“Ky është skandal kombëtar dhe ndërkombëtar. Hetoni transaksionet e këtyre studiove me sulltanatin e Edi Ramës”, u shpreh Berisha.
