Një bllokim i përkohshëm i qarkullimit është regjistruar në aksin Hotolisht–Librazhd, pasi gurë të mëdhenj janë shkëputur nga zona ku po zhvillohen punime për ndërtimin e rrugës së re.
Sipas raportimeve nga vendngjarja, rënia e gurëve ka penguar kalimin e automjeteve dhe ka krijuar rrezik për drejtuesit e mjeteve, duke sjellë paralizimin e trafikut për rreth një orë. Kolona e automjeteve ka arritur deri në 5 kilometra, ndërsa drejtuesit janë detyruar të presin deri në pastrimin e rrugës.
Ngjarja ka rikthyer shqetësimet për sigurinë në kantieret infrastrukturore dhe për masat mbrojtëse që duhet të shoqërojnë punimet në akset rrugore. Mungesa e sinjalistikës dhe e masave të nevojshme të sigurisë ka krijuar një situatë të rrezikshme për qarkullimin.
Incidenti nxjerr në pah edhe problematikat që lidhen me kontrollin dhe mbikëqyrjen e punimeve publike, ndërsa qytetarët shpesh përballen me vështirësi dhe rreziqe gjatë lëvizjes në rrugë ku po kryhen ndërhyrje.
Fatmirësisht, deri më tani nuk raportohet për persona të lënduar, por ngjarja ka shkaktuar shqetësim dhe vonesa të konsiderueshme në qarkullimin e mjeteve.
*Video Credit: Joq
