Një gjykatë në Korenë e Jugut ka dënuar këtë të premte ish-presidentin Yoon Suk Yeol me 30 vite burg, pasi e shpalli fajtor për dërgimin e dronëve në territorin e Koresë së Veriut, përcjell DW.
Sipas prokurorëve, veprimi i Yoon ishte një përpjekje e qëllimshme për të rritur tensionet me Phenianin dhe për të justifikuar tentativën e tij të dështuar për të shpallur gjendjen e jashtëzakonshme ushtarake në dhjetor të vitit 2024.
Vendimi u dha nga Gjykata Qendrore e Seulit, e cila e gjeti ish-presidentin fajtor për shpërdorim detyre dhe ndihmë ndaj armikut. Yoon ka mohuar akuzat ndaj tij.
Po ashtu, me 30 vite burg u dënua edhe ish-ministri i Mbrojtjes, Kim Yong Hyun, i konsideruar një nga bashkëpunëtorët kryesorë në këtë çështje.
Problemet ligjore të Yoon nisën pas vendimit të tij për të vendosur ligjin ushtarak, një masë që çoi në shkarkimin e tij nga detyra. Ai u padit për disa vepra penale që lidhen me këtë vendim dhe u largua zyrtarisht nga posti në prill 2025.
Më herët, në shkurt, Yoon ishte dënuar me burgim të përjetshëm për drejtimin e një kryengritjeje dhe cenimin e rendit kushtetues. Gjykata kishte argumentuar se vendimi i tij për të shpallur ligjin ushtarak synonte paralizimin e Kuvendit Kombëtar.
Çështja lidhet me një incident të ndodhur në tetor 2024, kur Koreja e Veriut pretendoi se dronë të Koresë së Jugut kishin fluturuar mbi Phenian tri herë për të hedhur fletushka propagandistike. Në atë kohë, autoritetet në Seul nuk e konfirmuan dhe as nuk e mohuan zyrtarisht ngjarjen.
Avokatët e Yoon kanë deklaruar se ish-presidenti nuk kishte urdhëruar dhe as miratuar operacionin me dronë, duke argumentuar se ai ishte një reagim ndaj balonave me mbetje që Koreja e Veriut kishte dërguar drejt jugut dhe përbënte një akt legjitim vetëmbrojtjeje.
Yoon, i cili ndodhet tashmë në paraburgim, ka të drejtën të apelojë vendimin e gjykatës.
