Evropa duhet të ndërmarrë heqjen e rregulloreve për të rritur konkurrueshmërinë përballë goditjes energjetike të shkaktuar nga lufta në Iran, ose rrezikon një krizë “papunësie masive”, ka paralajmëruar kreu i një prej grupeve më të mëdha inxhinierike të bllokut.
Morten Wierod, shefi ekzekutiv i ABB-së, tha për FT se ligjvënësit evropianë nuk kanë shfaqur “asnjë ndjenjë urgjence” në ndjekjen e deregulimit, madje edhe në një kohë kur rritja e çmimeve të gazit në Evropë po dëmton konkurrueshmërinë e bllokut në krahasim me SHBA-në.
Ai vuri në dukje se plani për reforma, i komisionuar nga Komisioni Evropian dhe i shkruar nga ish-kryeministri italian Mario Draghi, u publikua pothuajse dy vjet më parë, por se është bërë shumë pak në lidhje me të.
“Shpresoj se nuk do të jetë e nevojshme të shohim një krizë shumë më të madhe që do të nënkuptonte papunësi masive. Kjo nuk duhet të jetë e nevojshme për të krijuar atë ndjenjën e duhur të urgjencës,” tha Wierod në një intervistë në Nju Jork.
“Tregu i përbashkët ose BE-ja duhet të heqë më shumë legjislacion, dhe jo vetëm ta thjeshtojë atë, por ta eliminojë dhe të nxisë më shumë një treg të përbashkët; kjo do të nxisë rritjen ekonomike.”
ABB, e cila e ka qendrën në Cyrih të Zvicrës, është një nga kompanitë më të mëdha të inxhinierisë industriale dhe teknologjisë në Evropë, me një kapitalizim tregu prej pothuajse 200 miliardë dollarësh. Ajo punëson 52,400 njerëz në Evropë – pothuajse dyfishin e numrit të stafit që punëson në SHBA, i cili është rajoni me të adhurat më të larta për grupin.
Wierod tha se plani i shpallur nga Brukseli këtë javë për të vendosur rregulla që reduktojnë varësinë nga teknologjia e huaj mund të ketë “pasoja të padëshiruara” dhe të rrisë kostot.
Ne jemi pro tregtisë së hapur… ne shohim se kur e ndërton këtë legjislacion rreth disa prej diskutimeve ‘Made in Europe’ që po zhvillohen tani – ka gjithmonë efekte anësore.”
Wierod është udhëheqësi më i fundit i lartë i biznesit që i bën thirrje Evropës të reduktojë burokracinë dhe të zbatojë reforma për të rritur konkurrueshmërinë e bllokut.
Në tetor, shefat ekzekutivë të TotalEnergies dhe Siemens i shkruan një letër të hapur presidentit francez Emmanuel Macron dhe kancelarit gjerman Friedrich Merz, duke u bërë thirrje shteteve të BE-së të shfuqizojnë një ligj parësor mbi qëndrueshmërinë korporative. Ligjvënësit e BE-së ranë dakord për reforma për të zvogëluar këtë ligj në mars.
Komisioni ka nisur një nismë “thjeshtimi” për të reduktuar burokracinë, e cila sipas tij ka prodhuar tashmë 15 miliardë euro kursime vjetore për bizneset dhe autoritetet kombëtare.
Por progresi në zbatimin e raportit Draghi të vitit 2024, i cili theksoi një hendek në rritje të produktivitetit midis SHBA-së dhe Evropës, ka qenë i ngadaltë. Vetëm 10 për qind e 383 propozimeve të tij janë miratuar, sipas një sistemi gjurmimi në internet.
Wierod tha se Evropa ka disa aspekte shumë të forta: fuqinë e saj punëtore, qasjen në arsim të cilësisë së lartë dhe përvojën në menaxhimin e krizave.
“Nëse do të shihnit se si Evropa ishte në gjendje të përballej dhe të ndryshonte varësinë nga gazi rus – kjo ndodhi shpejt, nga 35 për qind në 10 për qind brenda një viti. Pra, menaxhimi i krizave ekziston.”
Por ai tha se presionet konkurruese po rriten në Evropë për shkak të inflacionit të çmimit të gazit, të shkaktuar nga ndërprerja e furnizimeve nga Lindja e Mesme prej luftës në Iran.
“Nuk jam i shqetësuar se Evropa nuk do të ketë gaz. Do të ketë. Por ai do të vijë me një çmim më të lartë, dhe kjo ishte ajo që pamë në vitin 2022 – dhe ne e dimë se këto çmime [më të larta] të gazit do të mbeten edhe për vitet 2026 dhe 2027,” tha Wierod.
“Kështu që kjo, natyrisht, do të ketë përsëri më shumë ndikim në konkurrueshmërinë evropiane sesa në atë të Shteteve të Bashkuara, sepse ju keni gazin tuaj.”
Deri në 1.3 milionë vende pune në BE mund të humbasin si rezultat i çmimeve më të larta, tha të mërkurën Roxana Mînzatu, komisionerja evropiane për vendet e punës.
ABB po lobon te vendimmarrësit e BE-së për të përshpejtuar elektrifikimin, efikasitetin industrial dhe dekarbonizimin, duke thënë se kjo është mënyra më e shpejtë për ta bërë bllokun më konkurrues.
