Gykata e Posaçme kundër Korrupsionit dhe Krimit të Organizuar (GJKKO) ka dhënë vendimin penal për ish-kryetaren e komanduar të Bashkisë së Tropojës, Zyra Islamaj, duke e dënuar atë me 2 vite e 1 muaj burg për akuzën e korrupsionit pasiv.
Për shkak të rrethanave, ky dënim është pezulluar dhe konvertuar në 2 vite shërbim prove, me kushtin që ajo të mos kryejë asnjë vepër tjetër penale gjatë kësaj periudhe.
Përveç dënimit me kusht, gjykata ka aplikuar edhe dënimin plotësues për ish-zyrtaren e lartë vendore, duke i hequr zyrtarisht të drejtën për të ushtruar çdo lloj funksioni publik për një periudhë prej 5 vitesh.
Në të njëjtën dosje penale të hetuar nga SPAK, GJKKO ka deklaruar fajtor edhe biznesmenin e ndërtimit, Rrok Gega, i cili akuzohej për korrupsion aktiv. Gega u dënua fillimisht me 6 muaj burg, por edhe për të gjykata vendosi pezullimin e ekzekutimit, duke e lënë në shërbim prove për një afat prej 1 viti.
Hetimet e Strukturës së Posaçme zbuluan se Zyra Islamaj kishte shfrytëzuar postin e saj zyrtar gjatë mbarëvajtjes së një tenderi publik për të përfituar favore personale dhe familjare.
“Sipas dosjes, bëhet fjalë për një tender ku Islamaj dyshohet se i kishte kërkuar ndërtuesit Rrok Gega ndërtimin e një ure pranë banesës së motrës së saj, urë e cila nuk ishte parashikuar në projekt,” – sqarohet në materialet hetimore të prokurorisë.
Për të realizuar këtë ndërhyrje jashtë planit zyrtar të punimeve, ish-kryetarja e komanduar nuk kishte ushtruar presion vetëm mbi kompaninë fituese të tenderit, por kishte angazhuar në këtë skemë abuzive edhe teknikun e mirëmbajtjes së rrugëve të vetë Bashkisë së Tropojës.
