Presidenti i Shteteve të Bashkuara, Donald Trump, deklaroi se nuk do të përdorë më termin “luftë” për të përshkruar fushatën ushtarake kundër Iranit, duke theksuar se përdorimi i këtij termi kërkon miratim nga Kongresi.
Sipas Fox News, gjatë një darke vjetore për mbledhje fondesh të organizuar nga National Republican Congressional Committee në Uashington, Trump tha se do të përdorë termin “operacion ushtarak”.
“Nuk do ta përdor fjalën ‘luftë’, sepse thonë që nëse e përdor, duhet të marrësh miratim. Do të përdor ‘operacion ushtarak’, që në fakt është ajo që është. Është një goditje ushtarake shkatërruese”, u shpreh ai.
Sipas Kushtetutës amerikane, vetëm Kongresi ka të drejtën të shpallë luftë. Që nga fillimi i përplasjes me Iranin në fund të muajit të kaluar, demokratë dhe disa republikanë kanë kundërshtuar veprimet e presidentit, duke i konsideruar si jokushtetuese pa autorizim të Kongresit.
Megjithatë, Senati rrëzoi sërish këtë javë një rezolutë për kompetencat e luftës, me votat 53-47, e cila do të kërkonte miratim të qartë nga Kongresi për çdo angazhim të mëtejshëm ushtarak kundër Iranit.
Senatori republikan Rand Paul reagoi pas votimit duke theksuar: “Vetëm Kongresi mund të shpallë luftë. Nuk është mendimi im, është Neni 1 i Kushtetutës. Ne e detyruam votimin, Senati tha ‘jo’. Historia nuk do të jetë e sjellshme me një Kongres që heq dorë nga përgjegjësia e tij më e rëndësishme.”
Debati mbi kompetencat kushtetuese dhe rolin e Kongresit pritet të vijojë, ndërsa tensionet mes Uashingtonit dhe Teheranit mbeten të larta.
