Ish-presidenti amerikan Bill Clinton ka deklaruar se nuk kishte dijeni për krimet seksuale të financierit të ndjerë Jeffrey Epstein, sipas një videoje të publikuar nga një komision i Kongresit amerikan, përcjell DW.
Regjistrimi përfshin dëshminë e dhënë nën betim përpara Komitetit të Mbikëqyrjes së Dhomës së Përfaqësuesve, e cila u zhvillua gjatë dy ditëve javën e kaluar.
Gjatë dëshmisë, Clinton tha se ishte distancuar nga Epstein vite përpara se ky i fundit të pranonte fajësinë në vitin 2008 për kërkim prostitucioni nga një e mitur.
Ai theksoi se e kishte takuar për herë të parë Epstein në vitin 2002, kur kishte udhëtuar me avionin privat të financierit në kuadër të aktiviteteve humanitare të familjes Clinton. Sipas tij, marrëdhënia mes tyre u ndërpre një vit më pas.
“Nuk pashë asgjë kur isha pranë tij që të më bënte të kuptoja se ai po trafikonte gra,” tha Clinton para ligjvënësve.
Ndërkohë, ish-sekretarja e Shtetit Hillary Clinton, e cila dëshmoi një ditë më herët, deklaroi se nuk e mban mend të ketë takuar Epstein.
Gjatë dëshmisë, Clinton përmendi edhe një bisedë të hershme me Donald Trump, përpara se ai të bëhej president. Sipas Clinton, Trump i kishte thënë se kishte kaluar “kohë shumë të mira” me Epstein ndër vite, por se ishin ndarë për shkak të një marrëveshjeje të pasuksesshme pasurie të paluajtshme.
“Disi, ai e dinte që unë kisha fluturuar me avionin e Jeffrey Epstein,” tha Clinton, duke shtuar se Trump nuk kishte thënë asgjë që ta bënte të mendonte për përfshirje të papërshtatshme në lidhje me Epstein.
Si Clinton ashtu edhe Trump kanë pranuar më herët se kanë pasur njohje me Epstein përpara pranimit të fajësisë nga ana e tij në vitin 2008, por kanë mohuar të kenë pasur dijeni për trafikim seksual apo veprimtari të paligjshme.
Dëshmitë e çiftit Clinton vijnë në një kohë kur kërkesat për transparencë dhe përgjegjësi lidhur me dosjet Epstein janë shtuar, megjithatë ndaj tyre nuk është ngritur asnjë akuzë për shkelje ligjore.
