Kryebashkiaku i Devollit, Eduart Duro u paraqit në SPAK pasi u mor i pandehur për ‘Shpërdorim Detyre’.
Eduard Duro u mor i pandehur nga Prokuroria e Posaçme më 29 Tetor për akuzën e shpërdorimit të detyrës.
Kryebashkiaku socialist akuzohet për veprën penale ‘shpërdorim detyre’, pasi sipas dyshimeve, ka licencuar një pikë karburanti e cila ishte ndërtuar pa leje.
Pas marrjes si të pandehur, Duro ka reaguar duke thënë se ka firmosur çdo gjë siç e kërkon ligji.
“Sektori i tatim taksave ka dhënë autorizim për shitje karburanti brenda dhe konform ligjit.
Shtetasit J.K dhe M.K kanë bërë denoncim se ky dokument nuk duhej dhënë subjektit “Genci Petrol”.
Kam firmosur çdo gjë siç e kërkon ligji dhe nuk bëhet fjala për shpërdorim detyre por për detyrë të plotësuar në kushtet e një kryetari bashkie”, ka deklaruar Eduard Duro..
