Ministri i Jashtëm i Izraelit anashkaloi diskutimin për një zgjidhje me dy shtete të konfliktit izraelito-palestinez në një takim me homologët e Bashkimit Evropian, duke zgjedhur t’u shfaqte atyre video aspiruese të projekteve të ardhshme të infrastrukturës.
Ministri, Israel Katz, ishte në Bruksel për diskutime mbi Lindjen e Mesme, duke u përqendruar kryesisht në pasojat e sulmit të grupit militant palestinez Hamas në 7 tetor mbi Izraelin dhe ofensivës hakmarrëse të Izraelit në Gaza.
Ministrat e BE-së ishin të prirur të theksonin thirrjet e tyre për krijimin e një shteti palestinez përkrah Izraelit, si pjesë e një marrëveshjeje gjithëpërfshirëse afatgjatë të paqes. Por qeveria izraelite është shprehur kundër thirrjeve të tilla.
Në takim, Katz u tregoi ministrave video të një ishulli artificial të parashikuar në brigjet e Gazës dhe një rrjeti hekurudhor që lidh Lindjen e Mesme me Indinë, tha shefi i politikës së jashtme të BE-së Josep Borrell dhe diplomatë të tjerë të BE-së.
Borrell e bëri të qartë se nuk ishte i impresionuar me lëvizjen.
“Ministri na tregoi disa video që kishin pak ose aspak të bënin me çështjet që po diskutonim,” u tha Borrell gazetarëve, duke shtuar se ai mendonte se Katz mund ta kishte përdorur më mirë kohën e tij me kolegët e tij të BE-së.
Ministrat e BE-së u takuan gjithashtu veçmas me homologët e tyre nga Arabia Saudite, Egjipti dhe Jordania, si dhe me ministrin e Jashtëm palestinez Riyad al-Maliki, ndërsa diskutuan si për krizën e tanishme në Gaza ashtu edhe për Lindjen e Mesme më të gjerë.
Përpara takimit, Borrell u dërgoi një dokument diskutimi 27 vendeve anëtare të BE-së, duke sugjeruar një udhërrëfyes drejt paqes në konfliktin më të gjerë izraelito-palestinez.
Në qendër të planit është një thirrje për një “konferencë përgatitore të paqes” që do organizohet nga BE-ja, Egjipti, Jordania, Arabia Saudite dhe Lidhja e Shteteve Arabe, me Shtetet e Bashkuara dhe Kombet e Bashkuara të ftuara gjithashtu që të jenë thirrës të mbledhjen.
Por takimi i së hënës nuk dukej se ndryshoi pozicionin e Izraelit një ditë pasi kryeministri Benjamin Netanyahu ripohoi një linjë të ashpër kundër çdo shteti palestinez mbi bazën se ai do përbënte “një rrezik ekzistencial” për Izraelin.
Sidoqoftë, Borrell tha se donte të vazhdonte përpjekjet ndërkombëtare për të zbatuar një zgjidhje me dy shtete, megjithëse ai nuk shpjegoi se si mund të arrihet kjo nëse Izraeli vazhdon ta kundërshtojë atë.
Bisedimet e fundit për një zgjidhje të tillë dështuan një dekadë më parë mes mosbesimit të ndërsjellë dhe mospërputhjes.
Ofensiva masive ajrore dhe tokësore e Izraelit në Gazën e vogël dhe me popullsi të dendur ka vrarë më shumë se 25,000 palestinezë, sipas autoriteteve shëndetësore të enklavës së drejtuar nga Hamasi, ka rrafshuar zonat e ndërtuara dhe ka lënë shumicën e 2.3 milionë njerëzve të saj të pastrehë.
Izraeli ka thënë se lufta mund të vazhdojë për “shumë muaj” dhe ajo nuk do pushojë derisa Hamasi të çrrënjoset, të gjithë pengjet izraelitë të lirohen dhe Rripi i Gazës të mos përbëjë më kërcënim për sigurinë.
Gjatë rrugës për në takim, Katz u tha gazetarëve se donte që BE-ja të përqendrohej në përpjekjet për të goditur rrjetin e Hamasit dhe për të ndihmuar në çlirimin e pengjeve të mbajtura nga grupi militant.
Por ministri i Jashtëm jordanez Ayman Safadi tha se ishte koha që komuniteti ndërkombëtar të deklarojë se një zgjidhje me dy shtete ishte e vetmja mundësi dhe ta zbatojë atë.
“Një moment i së vërtetës është pranë nesh,” tha ai.
